ژاپۆن.. لەناوبردنی پێنج ملیۆن و ٨٠٠ ھەزار پەلەوەر بەھۆی ئەنفلۆنزای باڵندە

ھەولێر ــ AA

دوای بڵاوبوونەوەی ئەنفلۆنزای باڵندە لە تشرینی دووەمی ساڵی رابردوودا لە ژاپۆن، تا ئێستا بەرپرسانی ئەو وڵاتە، پێنج ملیۆن و ٨٠٠ ھەزار پەلەوەریان لەناوبردووە.

چەند سەرچاوەیەک کە ناوی خۆیان ئاشکرانەکردووە بۆ دەستەی رادیۆی ژاپۆن (NHK) رایانگەیاندووە "دوایین جار لەناوبردنی ئەو ژمارە زۆرەی پەلەوەر لە زستانی ٢٠٠٥ و ٢٠٠٦دا تۆمارکرابوو کە ئەو کات بەرپرسانی ژاپۆن ناچاربوون بەھۆی بڵاوبوونەوەی ئەنفلۆنزای باڵندە، پێنج ملیۆن و ٧٨٠ ھەزار پەلەوەر لەناو ببەن".

سەرچاوەکان ئەوەشیان ئاشکراکردووە کە تا ئێستا ئەنفلۆنزای باڵندە لە ٣٦ کێڵگەی پەلەوەر لە ١٥ پارێزگای ژاپۆن بڵاوبووەتەوە.

ئاماژەیان بەوەیشداوە کە پێشبینی دەکرێت، بەھۆی بڵاوبوونەوەی ئەنفلۆنزای باڵندە، تا کۆتایی ئەم وەرزە، ژمارەی لەناوبردنی پەلەوەرەکان لە ژاپۆن بگاتە شەش ملیۆن پەلەوەر.

ئەنفلۆنزای باڵندە، یەکیکە لە نەخۆشییە گوازراوەکان، کە لە رێگەی باڵندە و ئاژەڵە کێوییەکانەوە دەگوازرێتەوە.