ھەولێر ــ AA

گوتەبێژی فەرماندەیی ئۆپەراسیۆنە ھاوبەشەکانی عێراق، لیوا تەحسین خەفاجی سەبارەت بە پلانی کشاندنەوەی راوێژکارانی سەربازیی سەربە ھاوپەیمانیەتی نێودەوڵەتی دژبە داعش لە عێراق رایگەیاند کە ئەو پلانە وەک خۆی جێبەجێ دەکرێت.

لیوا تەحسین خەفاجی سەبارەت بە پلانی کشاندنەوەی ھێزە بیانییەکان لە عێراق لە لێدوانێکی رۆژنامەوانییدا گوتی: "لیژنەیەک بە فەرمانی سەرۆکوەزیران و فەرماندەی گشتیی ھێزە چەکدارەکان، مستەفا کازمی پێکھێنراوە کە لەگەڵ ھاوپەیمانیەتی نێودەوڵەتی دژبە داعش، پلانیان بە ئامانجی کشاندنەوەی راوێژکارە سەربازییە بیانییەکان لە عێراق، داناوە".

راشیگەیاند کە پلانی کشاندنەوەی راوێژکارانی ھاوپەیمانیەتی نێودەوڵەتی دژبە داعش لە عێراق وەک خۆی جێبەجێ دەکرێت و گوتی:

"بەم دواییانە وەزارەتی بەرگریی ئەمریکا، ٥٠٠ راوێژکاری سەربازیی خۆی لەچوارچێوەی ھاوپەیمانیەتی نێودەوڵەتی دژبە داعش لە عێراق، کشاندووەتەوە".

گوتەبێژی فەرماندەیی ئۆپەراسیۆنە ھاوبەشەکانی عێراق، لیوا تەحسین خەفاجی جەختیکردەوە لەسەر ئەوەی کە وەزارەتی بەرگریی ئەمریکا رایگەیاندووە، ھێزە ئەمنییەکانی عێراق ئامادەیی ئەوەیان ھەیە، دۆسیەی ئەمنی عێراق بەڕێوەببەن.

ئەمەیش دوای وەدێت رۆژی ھەینی رابردوو وەزارەتی بەرگریی ئەمریکا رایگەیاندبوو کە ژمارەی سەربازییەکانیان لە عێراق بۆ دوو ھەزار و ٥٠٠ سەرباز کەمکردووەتەوە.