نەتەوە یەکگرتووەکان: "لە یەمەن ٤ ھەزار و ٧٣٣ سڤیل کوژراون"

جنێڤ - AA

رێکخراوی نەتەوە یەکگرتووەکان رایگەیاند لە ماوەی سێ ساڵدا لە شەڕی ناوخۆی یەمەن، چوار ھەزار و ٧٣٣ ھاووڵاتی مەدەنی کوژراون و ھەشت ھەزار و ٢٧٢ی دیکەش بریندار بوون.

بەپێی راگەیەندراوێکی کۆمسیاری باڵای مافەکانی مرۆڤ لە نەتەوە یەکگرتووەکان، لە وەتەی دەستپێکردنی شەڕی ناوخۆی یەمەن لە ٢٦ی ئاداری ٢٠١٥دا توندوتیژییەکان لەو وڵاتە لە بەرزبوونەوەدایە و لە دوا سێ مانگی دواییدا توندوتیژییەکان بەشێوەیەکی بەرچاو لەو وڵاتە بەرز بووەتەوە.

لە راگەیەندراوەکەدا ئاماژە بەوە کراوە کە لەم مانگەی دواییدا لە ئەنجامی بۆردومانی کەشتییە جەنگییەکان و ھێرشە ئاسمانییەکان لە یەمەن، ١٠٦ ھاووڵاتی مەدەنی کوژراون و راشگەیەندراوە کە لە ئەنجامی ھێرشکردنە سەر کەشتییەکی کۆچبەرانی سۆماڵ لە کەناراوەکانی دەریای سوور لە یەمەن ٣٢ کەس کوژرا و ١٠ کەسیش دیکەش بێسەروشوێن بوون.

لە بەشێکی راگەیەندراوەکەدا ئاشکرا کراوە کە لە وەتەی دەستپێکردنی شەڕی ناوخۆی یەمەن، چوار ھەزار و ٧٧٣ ھاووڵاتی مەدەنی کوژراون و ھەشت ھەزار و ٢٧٢ی دیکەش بریندار بوون و راشگەیەندراوە کە رەنگە ژمارەی قوربانیان و بریندارەکان زۆر لەو ژمارەیە بێت کە ئاشکرا کراوە.

ئەوەش خراوەتەڕوو کە سەدا ٨٢ ھاووڵاتی یەمەن واتا ٢١ ملیۆن کەس بەپەلە پێویستیان بە ھاوکاری مرۆیی ھەیە.

ساڵانێکە پێکدادانی نێوان حوسییەکان و لایەنگرانی سەرکۆماری لەکارلادراوی پێشووی یەمەن عەلی عەبدوڵڵا ساڵح لەگەڵ ھێزەکانی شەرعی حکوومەتی یەمەن لە ناوچەیەکی زۆری ئەو وڵاتە درێژەی ھەیە کە ناسەقامگیری بەدوای خۆیەوە ھێناوە.