"مانگی رابردوو سوپای ئیسرائیل ٤٢١ فەڵەستینی دەستگیرکردووە"

رامەڵڵا ــ AA

ژمارەیەک دەزگای فەڵەستینی تایبەت بە کاروباری بەندکراوان رایانگەیاند، سوپای ئیسرائیل لە مانگی ئایاری رابردوودا، ٤٢١ فەڵەستینی دەستگیرکردووە.

زاندراوە کە لەنێو دەستگیرکراوەکاندا، ٧٨ منداڵ و شەش ئافرەت ھەن.

دەستەی کاروباری دیل و ئازادکراوان سەربە رێکخراوی رزگاریخواز و یانەی دیلی فەڵەستینی و دەزگای ویژدان بۆ چاودێریکردنی دیل و مافەکانی مرۆڤ بە ھاوبەشی بەیاننامەکیان بڵاوکردەوە.

بەپێی بەیاننامەکە، ١٤٥ فەڵەستینی لە شاری قودس،٦٠ لە پارێزگای خەلیل، ١٢ لە کەرتی غەززە و ٢٠٤ی دیکەش لە چەند پارێزگایەکی کەناری رۆژئاوا لە لایەن سوپای ئیسرائیلەوە دەستگیرکراون.

لە بەیاننامەکەداھاتووە کە تا کۆتایی مانگی ئایاری رابردوودا، ژمارەی بەندکراوانی فەڵەستینی لە گرتووخانەکانی ئیسرائیلدا گەیشتووەتە پێنج ھەزار و ٥٠٠ کەس لەنێویاندا ٢٢٠ منداڵ و ٤٣ ئافرەت، ھەروەھا لەو ژمارەیە ٥٠٠ کەس بە فەرمانی کارگێڕی بەبێ دادگاییکردن، بەندکراون.