لێدوانی ترەمپ و کۆشکی سپی لەبارەی خاشقچی

واشنتۆن - AA

گوتەبێژی کۆشکی سپی، سارا ساندەرس لەبارەی کوژرانی رۆژنامەنووس، جەمال خاشقچی گوتی: "خەمباین بەوەی گیانلەدەستدانی بەرێز خاشقچی پشتڕاست کرایەوە. سەرەخۆشی ئاراستەی خانەوادە و دەستگیرانەکەی و خۆشەویستانی خاشقچی دەکەین".

گوتەبێژی کۆشکی سپی لەبارەی پشتڕاستکردنەوەی کوژرانی خاشقچی لەلایەن سعوودیە، راگەیەندراوێکی نووسراوی لەمبارەیەوە بڵاوکردەوە.

ساندەرس رایگەیاند کە ئاشکراکردنی لێکۆڵینەوەکانی پەیوەندیدار بە خاشقچی و گرتنەبەری رێوشوێنی پێویست بەرامبەر گومانلێکراوان لەلایەن سعوودیە، شتێکی قبوڵکراوە لەلایەن ئیدارەی ئەمریکا.

لە راگەیەندراوەکەی گوتەبێژی کۆشکی سپیدا ھاتووە:

"خەمباین بەوەی گیانلەدەستدانی بەرێز خاشقچی پشتڕاست کرایەوە. سەرەخۆشی ئاراستەی خانەوادە و دەستگیرانەکەی و خۆشەویستانی خاشقچی دەکەین. بەردەوام دەبین لە چاودێریکردنی لێکۆڵینەوە نێودەوڵەتییەکان لەبارەی ئەو رووداوە تراژیدییە ".

لەلایەکی دیکەش سەرۆکی ئەمریکا، دۆناڵد ترەمپ لەبارەی لێدوانەکانی سعوودیە پەیوەندیدار بە خاشقچی گوتی: "ھەندێک پرسیار لە سعوودیەکان دەکەین. لەمبارەیەوە بە ھاوبەشی لەگەڵ کۆنگرە کاردەکەین".

ترەمپ راشیگەیاند کە لە دوای رووداوی کوژرانی خاشقچی پارێزگاری لە رێککەوتنی فرۆشتنی چەک بە سعوودیە دەکات و راشیگەیاند کە "جۆرێک لە سزا" بەسەر سعوودیەدا دەسەپێنێت.