كۆنگرەی رۆژنامەوانی لقی سلێمانی كۆمیسیۆنی باڵای هەڵبژاردن و راپرسی

سلێمانی ـ AA

جێگری بەڕێوەبەری لقی سلێمانی كۆمیسیۆنی باڵای هەڵبژاردن و راپرسی لە هەرێمی كوردستان، دیار نەسرەددین لە كۆنگرە رۆژنامەوانیەكەدا تەواوبوونی ئامادەكارییەكانی بەڕێوەچوونی ریفراندۆم لە سنووری پارێزگاكە راگەیاند و رێنمایی چۆنیەتی دەنگدانی هاووڵاتییان ئاشكرا كرد.

دیار نەسرەددین گوتی: "لە ماوەی سێ‌ مانگی رابردوو دەستمان بە ئامادەكارییەكان كرد و ئەمڕۆ تەواوی ئامادەكارییەكان بە كۆتاييهات، هیچ گرفتێكمان نییە بۆ ریفراندۆمی سبەی و ناوەندەكان دەنگدان ئامادەن".

بە گوێرەی ئەو ئامارانەی كۆمیسیۆن كە ئەمڕۆ بڵاوكرانەوە، لە سنووری پارێزگای سلێمانی، یەک ملیۆن و271 هەزار كەس مافی دەنگدانیان هەیە، 74 ناوەندی دەنگدان كراونەتەوە، 514 بنكە و دوو هەزار و 679 وێستگەی دەنگدان لەو بنكانەدا هەن.

بەرپرسەكەی كۆمیسیۆن لە سلێمانی رایگەیاند کە لە سنووری پارێزگای سلێمانی، هەشت كەمپ بۆ ئاوارەكان و ئەو كەسانە كراونەتەوە كە ماددەی 140 دەیانگرێتەوە و دەتوانن دەنگ بدەن.

لە سنووری سلێمانی 31 رێكخراوی كۆمەڵی مەدەنی ناوی خۆیان تۆماركردووە بۆ چاودێریكردنی پڕۆسەكە، هەروەها 32 دەزگای راگەیاندنی ناوخۆ و ژمارەیەك دەزگا و كەناڵی تری راگەیاندنی بیانی رووماڵی راپرسییەكە دەكەن.

بڕیارە پڕۆسەكە سبەی لە كاتژمێر 8ی بەیانی دەست پێ بكات و تا كاتژمێر 6ی ئێوارە بەردەوام دەبێت.