سەرۆکی رووسیا پرسەنامەیەکی بۆ تەقینەوەکەی ئیستانبوڵ بڵاو کردەوە

مۆسکۆ - AA

سەرۆکی رووسیا، ڤلادیمیر پوتین لەو پرسەنامەیەدا کە سەبارەت بە تەقینەوەکەی ئیستانبوڵ ئاراستەی سەرکۆماری تورکیا، رەجەب تەیب ئەردۆغان-ی کردووە ئاماژەی بەوە داوە کە ئامادەن هاوکاری تورکیا بکەن لە پرسی بەرەنگاربوونەوەی تیرۆردا.

کرملین لە راگەیەندراوێکدا ئەوەی خستووەتەڕوو کە پوتین لە پەیامەکەیدا، پرسە و سەرەخۆشی خۆی بۆ کردە تیرۆریستییە دڵتەزێنەکەی ئیستانبوڵ راگەیاندووە.

سەرۆکی رووسیا، ڤلادیمیر پوتین جەختی لە پاڵپشتی خۆی بۆ خانەوادە و کەسوکاری قوربانییان کردووەتەوە و رایگەیاندووە: "هیوای زوو چاکبوونەوە بۆ بریندارەکانیش دەخوازین. ئامادەیی خۆمان دووپات دەکەینەوە بۆ هاوکاریکردنی هاوبەشە تورکەکانمان لە پرسی بەرەنگاربوونەوەی هەموو پێکهاتە و جۆرەکانی تیرۆر".