سوپای عێراق كۆنترۆڵكردنەوەی دوورگەی رومادی راگەیاند

ئەنبار ــ AA

فەرماندەی ئۆپەراسیۆنەكانی ئەنبار، لیوا روكن ئیسماعیل مەحلاوی رایگەیاند "دوورگەی رومادی لە باكووری شارەكە بە تەواوەتی لە ژێر دەستی رێكخراوی تیرۆریستی داعش دەرهێنرا و كۆنترۆڵكرایەوە".

لە ناوەڕاستی ساڵی 2014دا، رێكخراوی تیرۆریستی داعش دوورگەی رومادی باكووری شاری رومادی كۆنترۆڵ كردبوو.

لە لێدوانێكدا بۆ ئاژانسی ئانادۆڵو مەحلاوی گوتی: "هێزەكانی فیرقەی 10 بۆ دواجار بە تەواوەتی دوورگەی رومادی باكووری شارەكەیان لە ژێر دەستی داعش دەرهێنا و كۆنترۆڵیان كردەوە".

فەرماندە سەربازییەكە باسی لەوەیش كرد کە دوورگەی رومادی ناوچەكانی: ئەلبوعەلی جاسم، ئەلبوعەساف، ئەلبوزیاب، ئەلبوشەعبان، لەگەڵ ناوچەی تەرابشە لە خۆدەگرێت و لە ئێستادا تەواوی ئەو ناوچانە لە ژێر كۆنترۆڵی هێزەكانی سوپا دایە.

ئیسماعیل مەحلاوی ئەوەیشی ئاشكرا كرد كە لە میانی ئۆپەراسیۆنی كۆنترۆڵكردنەوەی دوورگەی رومادی، هێزەكانی فیرقەی 10 بە پشتیوانی فڕۆكەكانی هاوپەیمانێتی نێودەوڵەتی و فڕۆكەكانی جەنگی عێراق، دەیان تیرۆریستی داعشیان كوشتووە و هەروەها ژمارەیەك ئۆتۆمبێلی بۆمبڕێژكراوی تیرۆریستانیان تێكشكاندووە.

ناوبراو روونیشی كردەوە، هێزەكانیان لە سەرجەم ناوچەكانی دوورگەی رومادی بڵاو بوونەتەوە و هەروەها هەڵمەتی هەڵگرتنەوەی بۆمب و مینە چێنراوەكان لەو ناوچانە دەستی پێكردووە.

لە دوو هەفتەی رابردوودا، هێزەكانی عێراق ئۆپەراسیۆنی كۆنترۆڵكردنەوەی دوورگەی رومادی دەست پێكرد كە لە ناوەڕاستی ساڵی 2014دا رێكخراوی داعش كۆنترۆڵی كردبوو و لەوێیەوە بە بەردەوام هێرشە خۆكوژییەكانی بۆ ناو شاری رومادی ئەنجام دەدا.