سووریا.. هێرشی ئه‌سه‌د بۆسه‌ر گونده‌واری حه‌له‌ب كوژرانی دوو مه‌ده‌نی لێكه‌وته‌وه‌

ئیدلب - AA

لە ئاکامی ھێرشی ھێزەکانی رژێمی بەشار ئەسەد و گرووپە تیرۆریستییەکانی سەربە ئێران بۆسەر گوندەواری پارێزگای حەلەب باکووری سووریا، دوو ھاووڵاتیی مەدەنی کوژران و چواری دیکەیش برینداربوون.

ھێزەکانی رژێم بە مووشەکی زەوی بە زەوی ھێرشیان کردە سەر ناوچەکانی نیشتەجێبوون لە کەفەر نوران سەربە گوندەواری پارێزگای حەلەب کە لە سنووری ناوچەی کەمکردنەوەی بارگرژیی ئیدلب-دایە.

بەپێی ئەو زانیارییانەی لە سەرچاوەکانی بەرگریی شارستانی (کڵاو سپییەکان)ەوە بە دەستکەوتووە لە ھێرشەکەدا، دوو مەدەنی کوژراون کە یەکێکیان منداڵە و چوار مەدەنی دیکەیش برینداربوون.

دوا بە دوای ھێرشەکە برینداران گواسترانەوە بۆ نەخۆشخانەکانی ناوچەکە.

- رەوشی ئیدلب

لە دانوستانەکانی ئاستانادا کە لە چوار و پێنجی ئایاری ٢٠١٧ بە بەشداری تورکیا، رووسیا و ئێران بەڕێوەچوو، بڕیاردرا چوار "ناوچەی کەمکردنەی گرژیی" دروست بکرێت کە لەژێر کۆنترۆڵی رژێمی ئەسەدا نین.

بەڵام رژێمی بەشار ئەسەد و تیرۆریستانی پشتیوانییکراو لەلایەن ئێران بە پشتیوانی ھێزی ئاسمانیی رووسیا سێ دانەیان لەو چوار ناوچەیە کۆنترۆڵ کرد و روویان کردە ئیدلب، ھەرچەندە تورکیا لە ئەیلوولی ٢٠١٨دا لەگەڵ رووسیا رێککەوتنێکی واژوو کرد بۆ بەھێزکردنی ئاگربەستەکە، بەڵام لە ئایاری ٢٠١٩دا، سەرلەنوێ ھێرشەکان چڕبوونەوە، دواتر تورکیا و رووسیا لە پێنجی ئاداری ٢٠٢٠دا رێککەوتنێکی نوێیان واژوو کرد کە بەشێوەیەکی بەرچاو پارێزگاری لێ دەکرێت.

لەنێوان ساڵانی ٢٠١٧-٢٠٢٠دا، نزیکەی دوو ملیۆن ھاووڵاتی مەدەنی بەھۆی ھێرشەکانەوە ناچاربوون بەرەو ناوچەکانی نزیک سنووری سووریا لەگەڵ تورکیا کۆچ بکەن.