سوودان.. دەستلەکارکێشانەوەی سەرۆکی دەزگای ھەواڵگری

خەرتووم ــ AA

سەرۆکی دەزگای ھەواڵگری سوودان، سەڵاح قوش دەستیلەکارکێشایەوە.

راگەیەندرا کە سەرۆکی ئەنجوومەنی راگوزەری سەربازیی سوودان، جەنەراڵ عەبدولفەتاح بورھان دەستلەکارکێشانەوەکەی سەرۆکی دەزگای ھەواڵگری و ئاسایشی وڵاتەکەی، سەڵاح قوش-ی پەسەندکردووە.

نووسینگەی راگەیاندنی ئەنجوومەنی راگوزەری سەربازیی سوودان راگەیەندراوێکی بڵاوکردەوە و تیادا ئاماژەی بەوەداوە کە دوێنێ ھەینی سەرۆکی ھەواڵگری و ئاسایشی ئەو وڵاتە، سەڵاح قوش بە نووسراوێک دەستلەکارکێشانەوەی لە پۆستەکەی پێشکەشکردووە.

بەپێی راگەیەندراوەکە، سەرۆکی ئەنجوومەنی راگوزەری سەربازیی سوودان، جەنەراڵ عەبدولفەتاح بورھان دەستلەکارکێشانەوەکەی سەڵاح قوش-ی پەسەندکردووە.

دوای ئەوەی سوپای سوودان دەستی بەسەر حکوومەتی ئەو وڵاتەدا گرت، وەزیری بەرگری سوودان، عەوەز بن عۆف وەک سەرۆکی ئەنجوومەنی راگوزەری سەربازیی سوێندی یاسایی خوارد، بەڵام ٢٤ کاتژمێر بەسەر سوێندخواردنەکەیدا تێنەپەڕی و دەستی لەکارکێشایەوە.

دوێنێ ھەینی جەنەراڵ عەبدولفەتاح بورھان وەک سەرۆکی نوێی ئەنجوومەنی راگوزەری سوودان، سوێندی یاسایی خوارد.