رووسیا: "ژمارەیەك سەربازمان لە ئۆکراینا کوژراون و برینداربوون"

ئیستانبوڵ ــ AA

وەزارەتی بەرگریی رووسیا رایگەیاند کە لە میانی ئەو ھێرشە سەربازییەی کە ھێزەکانی لە ئۆکراینا ئەنجامی دەدەن، ژمارەیەک سەربازی رووسیا لەو وڵاتە کوژران و برینداربوون.

بەپێی ئاژانسی ھەواڵیی " Sputnik"ی گوتەبێژی وەزارەتی بەرگریی ئەو وڵاتە، ئیگۆر کۆناشینکۆڤ لە راگەیەندراوێکدا ئاماژەی بەوە داوە کە لەدەستپێکی ھێرشی سەربازیی ھێزەکانی رووسیا بۆسەر ئۆکراینا، تا ئێستا ٩٧٥ دامەزراوەی سەربازیی ئۆکراینا خاپوورکراون.

ئیگۆر کۆناشینکۆڤ راشیگەیاندووە کە ھەر لە دەستپێکی ھێرشی سەربازیی ھێزەکانی وڵاتەکەی بۆسەر ئۆکراینا، ٢٩ ناوەندی فەرماندەیی و گەیاندن، ٣٨ سیستەمی بەرگریی ئاسمانیی و ٥٦ سیستەمی راداری ئۆکراینا خاپوورکراون.

ئاشکراشی کردووە کە لە میانی ئەو ھێرشە سەربازییەی کە لە ئۆکراینا ئەنجام دەدەن، ژمارەیەک سەربازی رووسیا لەو وڵاتە کوژران و برینداربوون و گوتی: "زیانەکانی ئێمە، کەمترە لە زیانەکانی سەربازانی ئۆکراینا".