راگه‌یه‌نراوی حكوومه‌تی هه‌رێمی كوردستان

هه‌ولێر - AA
حكوومه‌تی هه‌رێمی كوردستان رایگەیاند "له‌و بۆردومانه‌ی ئێران بۆ ناو خاكی هه‌رێمی كوردستان، هاووڵاتییه‌ك شه‌هید و دووی دیكه‌ش برینداربوون".
حكوومه‌تی هه‌رێمی كوردستان له‌سه‌ر تۆبپارانكردنی خاكه‌كه‌ی له‌ لایه‌ن كۆماری ئیسلامی ئێرانه‌وه‌ به‌ده‌نگ دێت و له‌ راگه‌یه‌نراوێكدا داوای راگرتنی ده‌كات.
ئه‌مه‌ی خواره‌وه‌ ده‌قی راگه‌یه‌نراوه‌كه‌یه‌:
ڕاگه‌یه‌نراوێك له‌ حكوومه‌تى هه‌رێمى كوردستانه‌وه‌:

دوێنێ سێشەممە ٩/٧/٢٠١٩ لە ناوچه‌ى پیرانشارى سنووری لەگەڵ هەرێمى کوردستان، هێرشێکى چەکدارى کرایە سەر چەند ئەندامێکى سوپاى پاسداران له‌ به‌رامبه‌ردا کۆمارى ئیسلامیى ئێران ناوچە سنوورییەکانى ناوخاکى هەرێمى کوردستانى بۆردومان کرد. کە بەداخەوە بە هۆی بۆردومانەکە لە یەک خانەوەدەدا هاووڵاتییەک شەهید و دووی دیکەش برینداربوون. هه‌ردوو رووداوه‌كه‌ مایه‌ى نیگه‌رانى و ناڕه‌زاییى ئێمه‌یه‌.

دووپاتى ده‌كه‌ینه‌وه‌ هه‌رێمى كوردستان كه‌ سه‌لماندوویه‌تى له‌ ناوچه‌كه‌دا فاكته‌رى سه‌قامگیرییه و ڕێز له‌ هاوسنوورى و دراوسێیه‌تى ده‌گرێت‌، هه‌رگیز ‌ڕێگە نادات و به‌ هیچ شێوه‌یه‌ك قبووڵ ناكات‌ سنووره‌كانى بۆ هێرش و تێكدانى ئاسایشى وڵاتانى دراوسێ و كرده‌وه‌ى نابه‌رپرسانه‌ به‌كار بهێنرێت، داواش لە کۆمارى ئیسلامیى ئێران دەکەین بۆردومانكردنى ناوچه‌كە ڕابگرێت و نه‌بێته‌ هۆى دڵه‌ڕاوكێ و ده‌ربه‌ده‌ربوونى دانیشتووان.

حكوومه‌تى هه‌رێمى كوردستان
10/7/2019