تونس.. متمانە بەخشرایە حکوومەتەکەی هیشام میشیشی

تونس - AA

لە تونس کابینەی حکوومەتەکەی هیشام میشیشی کە لە کەسایەتی تەکنۆکرات پێکهاتووە، متمانەی پێ درا.

لە دەنگدانێکدا کە دوێنێ لە پەرلەمانی تونس دەستی پێ کرد و زیاتر لە ١٤ کاتژمێری خایاند، ١٣٤ پەرلەمانتار لە بەرژەوەندی حکوومەت دەنگیان دا و ٦٧ پەرلەمانتاریش لە دژی.

هەریەک لە پارتەکانی بزووتنەوەی نەهزە، دڵی تونس، ئیسڵاح، بژی تونس، کوتلەی نیشتمانیی و ئایندە لەگەڵ ژمارەیەک پەرلەمانتاری سەربەخۆ لەوانە بوون کە متمانەیان بەخشیە کابینەکەی هیشام میشیشی.

هاوکات پەرلەمانتارانی پارتەکانی کوتلەی دیموکراتی، هاوپەیمانی شکۆ و دەستووری ئازاد لە دژی حکوومەت دەنگیان دا.

هیشام میشیشی کە کابینەی حکوومەتەکەی بە ٢٥ وەزیری و سێ وەزیری دەوڵەت (جێگری وەزیر) پێکهێناوە لە گوتاری کردنەوەی دانیشتنی بەخشینی متمانە بە حکوومەتەکەی ئاماژەی بەوە کرد کە حکوومەتەکەی کار دەکات بۆ باشکردنی هەلومەرجەکانی ئابووریی و کۆمەڵایەتیی وڵات.