لێکۆڵینەوە لە رووداوەکەی ئەمڕۆی دیاربەکر دەکرێت

وەزیری ناوخۆی تورکیا ئیفکان ئاڵا بەمەبەستی لێکۆڵینەوە لە رووداوەکەی دیاربەکر ٤ لێکۆلەرەوەی راسپارد و رایگەیاند: "بە دڵنیاییەوە وەڵامێکمان بۆ رووداوەکە دەبێت، ئەو پەلامارە بۆسەر برایەتی و تەبایی گەلەکەمان بوو".

هەر یەک لە وەزیری ناوخۆی تورکیا ئیفکان ئاڵا و وەزیری داد بەکیر بۆزداغ لە بینای وەزارەتی ناوخۆ روونکردنەوەیان دەربارەی رووداوەکەی ئەمڕۆی دیاربەکر دا.

ئیفکان ئاڵا گوتی: "ئەمڕۆ سەعات ١١ی بەیانی لە نێو ئۆتۆمبێلێک دەسترێژی گولە کرایە سەر کۆنگرەیەکی رۆژنامەوانی بەرپرسی ژوری پارێزەران".

ناوبراو گوتی: "لە ئاکامی رووداوەکەش کارمەندێکی پۆلیس گیانی لەدەست دا و دوو کارمەندی دیکەش بریندار بوون هەروەها لەکاتی پێکدادانەکاندا بەرپرسی ژوری پارێزەرانی دیاربەکر تاهیر ئەلچی گیانی لەدەست دا".

وەزیری ناوخۆی، پرسە و سەرەخۆشی خۆی ئاراستەی خانەوادەی تاهیر ئەلچی و کارمەندە پۆلیسکە کرد و هەروەها هاوخەمی خۆشی ئاراستەی سەندیکای پارێزەران کرد.

ئیفکان ئاڵا گوتی: "سەبارەت بە رووداوەکە ٤ لێکۆلەرەوەمان راسپاردووە تا بەوردی لێکۆڵینەوە لە رووداوەکە بکەن، بە دڵنیاییەوە وەڵامێکمان بۆ رووداوەکە دەبێت، ئەو پەلامارە بۆسەر برایەتی و تەبایی گەلەکەمان بوو".

ناوبراو تیشکی خستە سەرئەوەی کە بە وردی لێکۆڵینەوە بۆ رووداوەکە دەکەن و گوتی: "لە ئێستادا لەگەڵ نوێنەرانی سەندیکای پارێزەران و خانەوادەکانیان رێکارە یاساییەکانی پزیشکی داد سەبارەت بە تەرمی خوا لێخۆشبوان تاهیر ئەلچی و کارمەندە ئاسایشەکە بەڕێوەدەچێت، لە نزیکترین کاتدا هۆکار و ئەنجامدەرانی رووداوەکە بۆ رای گشتی ئاشکرا دەکەین".