بەکارھێنانی دراوی خۆجێی لە ئاڵوگۆڕی بازرگانی نێوان تورکیا- رووسیا- ئێران

تاران - AA

سەرۆکی بانکی ناوەندی ئێران، عەبدولنەسر ھیممەتی رایگەیاند کە تورکیا، ئێران و رووسیا رێککەوتوون لەسەر ئەوەی ئاڵوگۆڕی بازرگانی بە دراوی خۆجێی خۆیان ئەنجام بدەن.

ھیممەتی لە لێدوانێکیدا بۆ رۆژنامەوانان رایگەیاند کە لە داھاتووێکی نزیکدا لەگەڵ بەڕێوەبەرانی بانکی ناوەندی رووسیا و تورکیا کۆدەبنەوە و بە شێوەیەکی خێرا دەستدەکەن بە جێبەجێکردنی ئەو پرسانەی کە لە رێککەوتنەکەدا پەسند کراوە.

ھیممەتی جەختیشی لەوە کردەوە کە لە لووتکەی سێقۆڵی، ئێران- رووسیا- تورکیا لە شاری تاران، کۆبوونەوەی گرنگیان لەگەڵ سەرکۆماری تورکیا، رەجەب تەیب ئەردۆغان و سەرۆکی رووسیا، ڤلادمیر پوتین ئەنجامداوە و دانوستانیان لەسەر پرسەکانی وەک بانک و ئاڵوگۆڕی کاڵا پێویستییەکان و نەوت و گاز کردووە.

ھیممەتی ئاماژه‌ی به‌وه‌شكردووه‌ کە ھەر سێ وڵات ھاوڕابوون لەسەر ئەوەی کە دراوی دۆلار لە بازرگانی بەکارنەھێنن و ھەر سێ وڵات بە دراوی خۆیان بازرگانی بکەن.

دوێنێ هه‌ینی، لووتکەی سێقۆڵیی تورکیا- رووسیا- ئێران کە تایبەت بوو بە تاوتوێکردنی دۆخی سووریا بە بەشداریی سەرکۆماری تورکیا، رەجەب تەیب ئەردۆغان، سەرکۆماری ئێران، حەسەن روحانی و سەرۆکی رووسیا، ڤلادیمیر پوتین لە شاری تاران ئەنجامدرا.