ئەردۆغان: " ئێستا زیاتر لە ھەزار و ١٥٠ داعش لە زیندانەکانی تورکیادا ھەن"
سەرکۆماری تورکیا، رەجەب تەیب ئەردۆغان: - "پشتیوانیی بکرێین یان نا، ئێمە لە میوانداریی کردنی میوانەکانمان (سوورییەکان) بەردەوام دەبین. ئەگەر زانیمان ئەم کارە ناچێتە سەر، ناچار دەبین دەروازەکان بکەینەوە".
Hungary
سەرکۆماری تورکیا، رەجەب تەیب ئەردۆغان ئاشکرایکرد کە پێویستە پرسی دووقۆڵیی نێوان تورکیا و ژمارەیەک لە وڵاتانی ئەندامی یەکێتیی ئەورووپا، نەبێتە ھۆی بە بارمتەگرتنی پەیوەندییەکانی نێوان یەکێتییەکە و وڵاتەکەی.
رەجەب تەیب ئەردۆغان لە ھەنگاریا لەگەڵ سەرۆکوەزیرانی ئەو وڵاتە، ڤیکتۆر ئۆربان کۆنگرەیەکی رۆژنامەوانییان سازکرد.
لەمیانی گوتەکانیدا ئەردۆغان رایگەیاند: "ھەڵوێستی ئەم دواییانەی یەکێتیی ئەورووپا بەرامبەر بە تورکیا دوورە لەوەی بنیاتنەرانە بێت. پێویستە پرسی دووقۆڵیی نێوان تورکیا و ژمارەیەک لە وڵاتانی ئەندامی یەکێتیی ئەورووپا، نەبێتە ھۆی بە بارمتەگرتنی پەیوەندییەکانی نێوان یەکێتییەکە و تورکیا".
- "چوار ملیۆن پەنابەر لە وڵاتەکەمانن"
سەرکۆماری تورکیا تیشکی خستەسەر ئەوەی کە تورکیا میوانداری لە چوار ملیۆن پەنابەر کردووە و گوتی: "ژمارەیەکی زۆر لەمانە دەکرێت کۆچ بکەن بەتایبەت بۆ ئەورووپا. ئەو ھەنگاوەی ویستوومانە لە رێگەی ناوچەی دامەزراندنی ئارامەوە بیھاوێژین، بە ئاراستەی دەستەبەرکردنی گەڕانەوەی پەنابەرەکانی لای ئێمەیە بۆ ماڵەکانیان و خاکی خۆیان".
- "لە ئێستادا لە گرتووخانەکاندا زیاتر لە ھەزار و ١٥٠ داعشی ھەن"
رەجەب تەیب ئەردۆغان ئاشکرایکرد کە خوشکی گەورەی بەغدادیی و ھاوسەرەکەیان قۆڵبەست کردووە و ئێستا لە زیندانن، ئەو گوتی: "١٣ کەسمان لە نزیکترین کەسەکانی دەوروبەری دەستگیرکردووە، ئەوانە ئێستا لای ئێمەن. لە ئێستادا لەسەر ئاستی جیھان وڵاتێکی دووەم نییە کە بەھێزتر لە تورکیا، کرداری دژی داعش ھەبێت".
ھەروەھا گوتی: "لە یەکەم ھەنگاودا نزیکەی سێ ھەزار چەکداری داعشمان لە ئەلباب لە چالاکی خست. ئێستا زیاتر ھەزار و ١٥٠ داعشی لە زیندانەکانی تورکیادا ھەن".
- "بۆچوونی تیرۆری باش و تیرۆری خراپ 'ھی من و ھی تۆ' نابێت"
ئەردۆغان رایگەیاند: "بەداخەوە ژمارەیەک لە ھاوبەشە ستراتیژییەکان لەگەڵ سەرکردەکانی رێکخراوی تیرۆریستیی کۆبوونەوە و ھەماھەنگییان ھەیە. ئەمە مایەی دڵتەنگیی ئێمەیە". گوتیشی: "بۆچوونی تیرۆری باش و تیرۆری خراپ 'ھی من و ھی تۆ' نابێت. ئەگەر ئەم بەرەنگاربوونەوەیە ئەنجام بدەین ئەوا بە پێداگرییەوە دەیکەین".
ھەروەھا گوتی: "قەدەغەی ھاتنمان بۆ نێو تورکیا خستووەتە سەر ٧٦ ھەزار کەس لە ١٥١ وڵاتی جیاواز. لە نێو ئەمانە داعش و تیرۆریستانی دیکەش ھەن".
- "بەردەوام دەبین لە میواندارییکردنی میوانەکانمان"
سەرکۆماری تورکیا لەبارەی پەنابەرە سوورییەکانی وڵاتەکەی دوا و رایگەیاند: "پشتیوانیی بکرێین یان نا، ئێمە لە میوانداریی کردنی میوانەکانمان (سوورییەکان) بەردەوام دەبین. ئەگەر زانیمان ئەم کارە ناچێتە سەر، ناچار دەبین دەروازەکان بکەینەوە".
- بابەتی سەردانیکردنی ئەمریکا
لەبارەی سەردانەکەی بۆ ئەمریکا، رەجەب تەیب ئەردۆغان رایگەیاند: "تاوتوێی پەیوەندییە دووقۆڵییەکان لەسەروو ھەموو شتێکەوە و گرفتە ھەرێمایەتییەکان دەکەین. لە کۆبوونەوەکەدا باسی بابەتەکانی S-400، پاتریۆت و F-35 دەکرێت".
- "مەزڵوم کۆبانی جیاوازیی لەگەڵ بەغدادیی نییە"
ئەردۆغان لە درێژەی گوتەکانیدا لەبارەی بەرەنگاربوونەوەی تیرۆرەوە دوا و رایگەیاند: "تەنھا بە کوشتنی ئەوانەی سەرکردایەتیی رێکخراوە تیرۆریستییەکان دەکەن، تیرۆر کۆتایی نایەت. ئەگەر بێت و نەتوانین پێویستییەکانی ھاوبەشیی ستراتیژیی بەجێبگەیەنین، ئەو تیرۆرەی ئەمڕۆ ئێمە دەکاتە ئامانج، سبەینێ لە وڵاتێکی دیکە دەدات".
ھەروەھا گوتی: "ھیچ جیاوازی نییە لە نێوان بەغدادیی و ئەو کەسەی ناوی مەزڵوم کۆبانییە. بەغدادیی چەند تیرۆریستێکی گرنگە، مەزڵوم کۆبانیش ئەوەندە".
- "S-400مان کڕی و ئەو کارە کۆتایی ھات"
سەرکۆماری تورکیا سەبارەت بە کڕینی سیستمی بەرگریی S-400 لە رووسیا لەلایەن وڵاتەکەیەوە، رایگەیاند: "S-400مان کڕی، ئەم کارە تەواوبووە، بەڵام ئەگەر ئەمریکا پاتریۆتمان بداتێ، لە حاڵەتی گونجاویی مەرجەکاندا، دەتوانین بیکڕین. ئەمەمان بۆ خۆشیان پێشنیارکردووە".