لوبنان..بەھۆی قەیرانی داراییەوە ھۆشداری لە بچڕانی ھێڵی ئینتەرنێت درا

بەیروت – AA

وەزیری پەیوەندییەکانی لوبنان، جۆنی قرم، ھۆشداری لەوە دایەوە کە بەھۆی کێشەی سووتەمەنییەوە کە پەیوەستە بە قیرانی ئابووری، ئەگەری ھەیە ھێڵەکانی پەیوەندی و ئینتەرنێت بە شێوەیەکی یەک لەدوای یەک ببچڕێت.

لەو راگەیەندراوەی کە جۆنی قرم بڵاویکردەوە، ئاماژەی بەوە کرد کە نەیانتوانیوە سووتەمەنی پێویست و سەرچاوەی دارایی بۆ بەکارخستنی سێکتەری پەیوەندییەکان دابین بکەن.

جۆنی قرم، ئەوەشی راگەیاند کە بەھۆی تەواوبوونی سووتەمەنی وێستەگەکانی تۆڕی پەیوەندییەکان لە چەند ناوچەیەکی وڵاتەکەدا لە کار کەوتووە و گوتی: "ھۆشداری لەوە دەدەینەوە کە ئەگەری ھەیە لە رۆژانی داھاتوودا ھێلەکانی پەیوەندیکردن و ئینتەرنێت بەشێوەیەکی یەک لەدوای یەک لە سەرانسەری لوبنان ببچڕێت."

قرم، داوای لە کۆمپانیای ئۆجیرۆی حکوومی کە خزمەتگوزاری ئینتەرنێت بۆ وڵاتەکە دابیندەکات سەرچاوە پەیدا بکات.

- قەیرانی ئابووریی لوبنان

لوبنان، بە تایبەتی لە ساڵی ٢٠١٩وە بۆ ئێستا رووبەڕووی قەیرانێکی ئابووریی جددی بووەتەوە.

کێشەی نەمانی دۆلار لە بانکی ناوەندیی لوبنان و تەواوبوونی دراوی بیانی قەیرانی جددیی دیکەی ھێنایە سەر وڵاتەکە.

لیرەی لوبنانی، بەڕێژەی سەدا ٩٠ بەھای لە بەرامبەر دۆلاری ئەمریکی لەدەستدا و بەپێی ئامارە نا فەرمییەکان ھەڵاوسان لە وڵاتەکەدا بۆ سەدا ٧٠٠ بەرزبووەتەوە.