3هه‌زار و 650 كۆمپانیای بیانى نووسینگه‌یان له‌ هه‌رێم كردوه‌ته‌وه‌

سلێمانى - AA
سه‌رۆكى گشتى یه‌كێتى هاورده‌و هه‌نارده‌كارانى هه‌رێمى كوردستان، مسته‌فا شێخ عه‌بدولره‌حمان، له‌ لێدوانێكى تایبه‌تدا به‌ ئاژانسى ئانادۆڵوى راگه‌یاند: "بوارى هاورده‌و هه‌نارده‌ له‌هه‌رێمى كوردستان به‌ دۆخێكى ناهه‌مواردا تێپه‌ڕ ده‌بێت ئه‌ویش به‌هۆى قه‌یرانى دارایى و ئابوورییه‌وه‌، به‌ڵام له‌ ساڵانى 2011 ی‌و 2013 هاورده‌و هه‌نارده‌ به‌ره‌وپێشبردنێكى باشى به‌خۆیه‌وه‌ بینیبوو، به‌ڵام له‌ ئێستادا هاورده‌و هه‌نارده‌ له‌ دۆخێكى باشدا نییه‌ ئه‌ویش به‌هۆى ئه‌وه‌ى چه‌ند ساڵێكه‌ هه‌رێمى كوردستان تووشى قه‌یرانى ئابوورى بووه‌.

ئه‌و هیواى خواست ساڵى 2017 وه‌ك ساڵانى 2015 و 2016 نه‌بێت و گوتى: "ئێمه‌ پلانمان ئه‌وه‌یه‌ كه‌ ئه‌مساڵ له‌گه‌ڵ خاوه‌ن كۆمپانیاكان كۆبینه‌وه‌ بۆئه‌وه‌ى سیاسه‌تى هاورده‌و هه‌نارده‌ى خۆیان بگۆڕن كه‌ بتوانن له‌گه‌ڵ كۆمپانیا بیانییه‌كان كاربكه‌ن چونكه‌ كۆمپانیا بیانییه‌كان هیچ قه‌یرانێكیان به‌سه‌ردا نه‌هاتووه‌، بۆیه‌ ئه‌گه‌ر كۆمپانیاكانى خۆمان به‌ هاوبه‌شى له‌گه‌ڵ كۆمپانیا بیانیه‌كان كار بكه‌ن ئه‌وا ده‌توانن بوارى هه‌نارده‌و هاورده‌ به‌رده‌وام بێت".

سه‌رۆكى گشتى یه‌كێتى هاورده‌و هه‌نارده‌كارانى هه‌رێمى كوردستان راشیگه‌یاند: "له‌ ئێستادا كه‌رتى كشتوكاڵ كه‌رتێكى زۆر گرنگه‌ و بۆیه‌ ئێمه‌ وه‌ك خۆمان به‌ پێویستى ده‌زانین زیاتر و باشتر گرنگى پێ بدرێت وه‌ توانیومانه‌ له‌م چه‌ند رۆژه‌ى رابردوو چه‌ندین كۆمپانیاى گه‌وره‌ بهێنینه‌ هه‌رێمى كوردستان و شارى سلێمانى بۆئه‌وه‌ى كارى هاورده‌و هه‌نارده‌ بكه‌ن و كارى هاوبه‌شیان له‌گه‌ڵدا بكه‌ین تاوه‌كو هه‌رێمى كوردستان پێ بنێته‌ قۆناغێكى نوێوه‌، هه‌روه‌ها ئێمه‌ كارده‌كه‌ین تاوه‌كو كه‌رتى كشتوكاڵێش بڕه‌وى پێ بدرێت".

مسته‌فا شێخ عه‌بودلره‌حمان، ئاماژه‌ى بۆ ئه‌وه‌شكرد: "له‌لایه‌ن حكوومه‌تى هه‌رێمى كوردستانه‌وه‌ كارى باش كراوه‌ تاوه‌كو كه‌رتى كشتوکاڵ به‌ره‌وپێش بڕوات ئه‌مساڵ كه‌رتى كشتوكاڵ به‌تایبه‌ت به‌ره‌وپێش چوونێكى باش به‌خۆیه‌وه‌ ده‌بینێت چونكه‌ هه‌وڵى زۆرى بۆدراوه‌ هه‌روه‌ها ئه‌گه‌ر كه‌رتى كشتوكاڵ به‌ره‌وپێش بڕوات ئه‌وا بوارى ئابوورى به‌ره‌وپێشه‌وه‌ ده‌ڕوات".

سه‌رۆكى گشتى یه‌كێتى هاورده‌و هه‌نارده‌كارانى هه‌رێمى كوردستان، ده‌ڵێت: "له‌ ئێستادا 3هه‌زار و 650 كۆمپانیای بیانى نووسینگه‌یان له‌ هه‌رێمى كوردستان كردوه‌ته‌وه‌ كارى هاورده‌و هه‌نارده‌كارى ده‌كه‌ن له‌ هه‌رێمى كوردستان".