ھەولێر – AA

وەزیری بەرگریی عێراق، سابت عەباسی لە میانی سەردانەکەی بۆ شاری کەرکووک لەگەڵ پارێزگاری کەرکووک بە وەکالەت، راکان سەعید جبوری و فەرماندەی ئۆپەراسیۆنەکانی کەرکووک و ژمارەیەک فەرماندەی باڵای ئەمنی کۆبوویەوە.

وەزارەتی بەرگریی عێراق لە راگەیەندراوێکدا ئاماژەی بەوەداوە لە کۆبوونەوەکەدا، ئەو ھەوڵانەی کە بە ئامانجی پتەوترکردنی ئاسایش و سەقامگیریی لە پارێزگای کەرکووک خراونەتەگەڕ تاوتوێ کراوە، ھەروەھا گفتوگۆکراوە لەبارەی پتەوترکردنی ھاریکاریی و ھەماھەنگییەکانی نێوان کارگێڕیی کەرکووک و فەرماندەیی ئۆپەراسیۆنەکان و سەرجەم ھێزە ئەمنییەکان لە پارێزگاکە.

راشیگەیاندووە کە وەزیری بەرگریی عێراق، سابت عەباسی لە میانی کۆبوونەوەکەدا، جەختی کردووەتەوە لەسەر ئەوەی کە پارێزگای کەرکووک، یەکێکە لە پارێزگا گرنگەکان و گوتوویەتی: "کاری لەپێشینەمان، گرنگیدانە بە پتەوترکردنی ئاسایش و سەقامگریی پارێزگای کەرکووک".

ئەمڕۆ چوارشەممە، وەزیری بەرگریی عێراق، سابت عەباسی بەمەبەستی ئاگاداربوون لە رەوشی ئەمنیی پارێزگای کەرکووک، گەیشتە شاری کەرکووک.