نەتانياهو خۆی له پرسیاری په‌یوه‌ست به كۆبوونەوەى لەگەڵ بن سەلمان دزییه‌وه
سەرۆكوەزيرانى ئيسرائيل بینیامین نەتانياهو، خۆى دزييەوە لە وڵامدانەوەى پرسیارێك له‌باره‌ی هەواڵەكانى كۆبوونه‌وه‌ی لەگەڵ شازادەى جێنشينى سعووديە، محەمەد بن سەلمان، كە له ميدياكانى ئيسرائيلدا بڵاوبووەتەوە.
Quds
قودس - AA
سەرۆكوەزيرانى ئيسرائيل بینیامین نەتانياهو، خۆى دزييەوە لە وڵامدانەوەى پرسیارێك له‌باره‌ی هەواڵەكانى كۆبوونه‌وه‌ی لەگەڵ شازادەى جێنشينى سعووديە، محەمەد بن سەلمان، كە له ميدياكانى ئيسرائيلدا بڵاوبووەتەوە.
بینیامین نەتانياهو لە كۆبوونەوەى پارتى ليكوود-دا هەڵسەنگاندنى بۆ بابەتەكانى رۆژەڤ كرد.
نەتانياهو لەبارەى دەنگۆكانى چوونى بۆ سعووديە و كۆبوونه‌وه‌ی له‌گه‌ڵ شازادەى جێنشينى سعووديە، محەمەد بن سەلمان، رایگه‌یاند: "چەندين ساڵە لێدوانم لەسەر ئەو جۆرە بابەتانە نەداوە و ئێستاش نايدەم. چەندين ساڵە له‌پێناو بەهێزكردنى ئيسرائيل و فراوانكردنى ئەڵقەى ئاشتى، خۆم لە هيچ شتێك نەشاردووه‌تەوە".
ميدياكانى ئيسرائيل بڵاویانكردەوە، دوێنێ نەتانياهو بە نهێنى چووەته شارى نيۆم لە سعووديە و لەوێ كۆبوونەوەيەكى سێ قۆڵى لەگەڵ هەريەك لە شازادەى جێنشينى سعووديە، شازادە محەمەد بن سەلمان و وەزيرى دەرەوەى ئەمريكا مايك پۆمپيۆ ئەنجامداوە.
لاى خۆيەوە وەزيرى دەرەوەى سعووديە، فەيسەڵ بن فه‌رحان ئال سعود، كۆبوونەوەى نێوان بن سەلمان و نەتانياهوی بە درۆخستەوە.
