قودس ــ AA

وەزیری دەرەوەی ئیسرائیل، یسرائیل کاتز ڕایگەیاند کە تا ئێستا هەڕەشەی لێدانی ئێران کارایە.

یسرائیل کاتز لە لێدوانێکدا بۆ ڕادیۆی سوپای ئیسرائیل، گوتی: "پێشتر ھەڕەشەی ئەوەمان کردووە لەوەی ئەگەر ئێران ھێرش بکاتە سەر ئیسرائیل، ئەوە ئێمەش ھێرش دەکەینە سەر ئێران و ھەڕەشەکەمان لەوبارەیەوە تا ئێستاش بەردەوامە".

ڕاشیگەیاندووە: "پێویستە ھاوکارییەکانمان لەگەڵ ھاوپەیمانەکانمان قووڵتر بکەینەوە، منیش سەرکردایەتی ھێرشێکی سیاسی دژبە ئێران دەکەم".

باسی لەوەش کردووە کە شەوی ڕابردوو، تەل ئەبیب دەیان داواکاریی پاڵپشتیکردنی لە جیھانەوە بەدەست گەیشتووە و گوتی: "ئێستا ئیمە پێویستمان بە بەدیھێنانی دوو ئامانج ھەیە کە یەکەمیان ئەوەیە، سوپای پاسداران وەک ڕێکخراوێکی تیرۆریستی بناسرێت و ئامانجی دووەمیش ئەوەیە، سزای کاریگەرتر بەسەر ئێراندا بسەپێندرێت".

لای خۆیەوە وەزیری کۆچ و گەڕانەوەی ئیسرائیل، ئۆفیر سۆفەر لە لێدوانێکدا بۆ ڕادیۆی سوپای ئیسرائیل، گوتی: "دەبێت بوێری ئێران بۆ ئەنجامدانی ھێرشێکی ھاوشێوەی شەوی ڕابردوو بۆسەر ئیسرائیل، بسڕدرێتەوە".

ھەر لەوبارەیەوە وەزیری پەروەردەی ئیسرائیل، یۆئاڤ گالانت لە ھەژماری خۆی لە تۆڕی کۆمەڵایەتی "X"، ڕایگەیاندووە: "بەھۆی ھاریکارییەکانی ھێزی ئاسمانی و بەرگریی ئاسمانی ئیسرائیل لەگەڵ ئەمریکا، تونرا بەرپەرچی ھێرشەکەی شەوی ڕابردووی ئێران بدرێتەوە".

یۆئاڤ گالانت لەبارەی وەڵامدانەوەی ھێرشەکەی ئێران نووسیوویەتی: "بە ئارامی و ژیرانە، کاتی ھێرشکردنە".