ئۆپەراسیۆن بۆسەر تیرۆریستانی داعش لە بیابانەكانی پارێزگای ئەنبار رۆژئاوای عێراق

بەغدا ــ AA

سوپای عێراق و حەشدی شەعبی ئۆپەراسیۆنێكیان بە ئامانجی راوەدوونانی تیرۆریستانی داعش لە بیابانەكانی سنووری پارێزگای ئەنبار رۆژئاوای عێراق، دەست پێ كرد.

راگەیاندنی حەشدی شەعبی لە راگەیەندراوێكیدا ئاماژەی بەوە داوە كە بەیانی ئەمڕۆ یەكشەممە، هێزەكانی سوپا و حەشدی شەعبی بە هاوبەشی ئۆپەراسیۆنێكیان بە ئامانجی راوەدوونانی تیرۆریستانی داعش لە بیابانەكانی سنووری پارێزگای ئەنبار رۆژئاوای عێراق، دەست پێكردووە.

باس لەوەیشكراوە، ئۆپەراسیۆنەكە بۆ ماوەی سێ رۆژ بەردەوام دەبێت كە ئامانج لێی، راوەدوونانی تیرۆریستانی داعش و پاراستنی ئاسایش و سەقامگیرییە لە ناوچەكە.

مانگی كانوونی یەكەمی ساڵی ٢٠١٧، ھێزە عێراقییەكان بە پاڵپشتی ھاوپەیمانیی نێودەوڵەتیی دژبە داعش و دوای سێ ساڵ لە شەڕی سەخت دژبە چەكدارانی رێكخراوی تیرۆریستیی داعش، كۆنترۆڵكردنەوەی تەواوی ئەو رووبەرەیان راگەیاند كە بە سەدا ٥٠ی خاكی عێراق ھەژماردەكرا كە داعش لە ھاوینی ٢٠١٤ كۆنترۆڵی كردبوو.

سەرۆكوەزیرانی پێشووتری عێراق، حەیدەر عەبادی لە نۆی كانوونی یەكەمی ٢٠١٧دا، سەركەوتنی بەسەر ئەو رێكخراوەدا راگەیاندبوو.

وێڕای ئەوەی ھێزەكانی عێراق داعش-یان لە ناوچەكان شكست پێ هێناوە و شارەكانیان ئازادكردووە، بەڵام شانە نووستووەكانی رێكخراوەكە تاكو ئێستا بەردەوامن لەسەر ھێرشەكانیان بەتایبەت لە گوندەواری پارێزگاكانی نەینەوا، كەركووك، مووسڵ، سەڵاحەددین و ئەنبار.