کوێستانەكانی هەکاری پێشوازی لە کۆچەرییەکان دەکات
- کوێستانی هان لە قەزای چوکورجا کە پڕە لە گژوگیای سوودبەخش و سەرچاوەی ئاوی سازگار، بە ڕانەمەڕەکان ڕازاوەتەوە.
Hakkari
هەکاری - AA
کوێستانی هان لە قەزای چوکورجا لە پارێزگای هەکاری کە ئاسایش و ئارامی تیایدا فەراهەم کراوە، بە کەشوهەوا فێنک و سەرچاوەی ئاوە سازگارەکانی و گژوگیا دەوڵەمەندەکەی میوانداری ئەو کۆچەرییانە دەکات کە لە پارێزگای شڕناخەوە ڕوویان تێکردووە.
کوێستانەکانی هەکاری کە یەکێکن لە ناوەندە گرنگەکانی بەخێوکردنی مەڕ و ماڵات، بەهۆی گژوگیا سوودبەخش و سەرچاوەکانی ئاوی سازگار کۆچەرییەکانی ناوچەکە بە هەزاران سەر مەڕ و ماڵاتەوە ڕوویان تێکردووە.
کۆچەرییەکانی شڕناخ کە لە مانگەکانی هاویندا بە هەزاران سەر مەڕ و ماڵاتەوە ڕوو لە کوێستانەکانی ناوچەکە دەکەن، لە کەنار کانیاوەکاندا خێوەتیان هەڵداوە و نیشتەجێبوون.
خێزانە کۆچەرییەکان کە بۆ نزیکەی پێنج مانگ لە کوێستانەکاندا دەمێننەوە، بە درێژایی وەرز ئاژەڵەکانیان لە ناوچەکەدا بەخێو دەکەن و، بەو شیرەی دەستیان دەکەوێت پەنیر و ڕۆن بەرهەم دەهێنن بژێوی ژیانیان پەیدا دەکەن.
لە کاتێکدا پیاوان بەشێکی زۆری کاتەکانیان بە بەخێوکردنی ئاژەڵەکانەوە بەسەر دەبەن، ژنانیش بە کاروباری ماڵ و دۆشینی ئاژەلەکانەوە سەرقاڵن و هاوکاری پیاوەکان دەکەن، بەو شیرەشی دەستیدەخەن پەنیر و ڕۆنی خۆماڵی بەرهەمدەهێنن.
منداڵانیش بە سواری گوێدرێژ و هێستر ڕۆژانە دوو جار دەچنە ئەو شوێنانی ئاژەڵەکان دەدۆشرێن و هاوکاری خێزانەکانیان دەکەن.
ئەرهان ئۆغوز کە لە قەزای ئیدیلی شڕناخەوە ڕووی لە ناوچەکە کردووە، باس لەوە دەکات نزیکەی ٢٠ ڕۆژە ڕوویان لە کوێستانەکانی هەکاری کردووە و بە درێژایی هاوین لەوێ دەمێننەوە.
ئەرهان ئۆغوز کە یەکێکە لە کۆچەرییەکانی ناوچەکە ڕایگەیاند: "نزیکی تەواوی ڕۆژ بە بەخێوکردنی ئاژەڵەکان و کارکردنەوە بەسەر دەبەین. کۆچەری قورسە بەڵام خۆشە. سروشتی ئێرە زۆر جوانە. یەکەمجارە دێینە ئێرە و زۆر دڵخۆشین".
