Arbil
نەینەوا ــ AA
وەك یارمەتییەك بۆ خۆپارێزی لە بڵاوبوونەوەی ڤایرۆسی كۆرۆنای نوێ (COVID-19)، حكوومەتی توركیا یارمەتی پزیشكی پێشكەش بە فەرمانگەی تەندروستیی نەینەوا كرد.
سەركۆنسولی توركیا لە مووسڵ، مەحمەد كوجۆكساكاڵێ لە لێدوانێكی رۆژنامەوانییدا راگەیاند "ڤایرۆسی کۆرۆنا بووەتە بەڵایەک کە هەموو جیهانی گرتووەتەوە. چ لە تورکیا و چ لە عێراق رێوشوێنی پێویست دژبە ڤایرۆسەکە گیراونەتەبەر، ئەمڕۆش بە ئامانجی هاوکاریکردنی هەوڵەکانی بەرەنگاربوونەوەی کۆرۆنا کۆمەڵێک پێداویستی پزیشکیمان هێناوە و رادەستی بەڕێوبەرایەتی تەندروستیی نەینەوامان کردوون. ئێمە دەمانەوێت تەندروستی دانیشتوانی مووسڵ پارێزراوبێت هەربۆیە ئەوە دووپاتدەکەینەوە کە لەم کاتەدا لە پاڵ گەلی مووسڵ دەبین".
مەحمەد كوجۆكساكاڵێ گوتی: "لەنێو ئەو پێداویستییانەی هێناومانن دەمامک و ماددەی پاککەرەوە هەن چونکە وەک دەزانن لەم قۆناغەدا گرنگترین شت خۆپارێزی و خاوێنییە.
هەموو جیهان بەهۆی ڤایرۆسی کۆرۆناوە بە رۆژگارێکی سەختدا تێدەپەڕێت. ئێمەش لەم قۆناغە سەختەدا مووسڵ-مان تەنها جێنەهێشت. دەستمان بە یارمەتیدان کرد و لە قۆناغی ئایندەشدا بەردەوام دەبین. رۆژ رۆژی هاوکاری و خۆڕاگرییە. تورکیا لەم قۆناغە سەختەدا پشتیوانی عێراق و مووسڵ-ە. تورکیا بەردەوام دەبێت لە یارمەتیدانی تورکمانەکانی تەلەعفەر و شارۆچکە و ناوچەکانی دیکەی عێراق".
سەركۆنسول توركیا لە مووسڵ، مەحمەد كوجۆكساكاڵێ ئاماژەی بەوەیشكرد كە ئەوان زۆر پەرۆشی پاراستنی گیانی دانیشتوانی نەینەوان و بەردەوام پاڵپشتیان لێ دەكەن.
لای خۆیەوە بەڕێوەبەری فەرمانگەی تەندروستیی نەینەوا، فەلاح حەسەن تائی لەبەرامبەر ئەو یارمەتییانە سوپاسی حكوومەت گەلی توركیای كرد و رایگەیاند بەردەوام توركیا رۆڵی گرنگی گێراوە لە پاڵپشتیكردنی فەرمانگەی تەندروستیی نەینەوا.
فەلاح حەسەن تائی ئەوەی وەبیرهێنایەوە كە زۆربەی نەخۆشخانە و بنكە تەندروستییەكان لە نەینەوا وێران بوون و گوتی: "لەئێستادا لەسەر ئاستی هەرێمیی و نێودەوڵەتی پێویستمان بە پاڵپشتی و یارمەتی هەیە بۆ بنیاتنانەوەی ئەوەی نەخۆشخانە و بنكە تەندروستییەكان لە نەینەوا بۆ ئەوەی باشترین خزمەتگوازری تەندروستی پێشكەش بە دانیشوانی پارێزگاكە بكەین".
راشیگەیاند كە لەئێستادا لە جەنگدان دژبە ڤایرۆسی كۆرۆنا و داواشی لە هاووڵاتییان كرد كە زیاتر پابەندبن بە رێنمایە تەندروستییەكان بۆ ئەوەی بەسەر ئەو ڤایرۆسەدا زاڵبن.
ماڵپەری ئاژانسی ئانادۆڵۆ، بەشێک لەم هەواڵە ئابۆنانەی کە بڵاوکراوەتەوە لە لیستی هەواڵەکانی ئاژانسی ئانادۆڵۆ، کورت و پوخت دەکرێت ئینجا بڵاودەکرێتەوە، بۆ ئابۆنەوە کردن تکایە پەیوەندی بکەن.
