کاروانێکی دیکەی هاوکاری سەربازیی هێزەکانی هاوپەیمانان رادەستی پیشمەرگە کرا

هەولێر - AA

هێزەکانی هاوپەیمانیی نێودەوڵەتی دژبە داعش کاروانێکی دیکەی هاوکارییان پێشکەشی وەزارەتی پێشمەرگە کرد و لە رێورەسمێکدا لە بەڕێوەبەرایەتی میرەی وەزارەتی پێشمەرگە هاوکارییەکان وەرگیران.

❮❯

کاروانێکی دیکەی هاوکاری سەربازیی هێزەکانی هاوپەیمانان رادەستی پیشمەرگە کرا

هاوکارییەکان پێکهاتبوون لە ٥٠ زرێپۆش لە جۆری هەمەر، ٢٩ بارهەڵگر، ٢٣ شۆفڵ و حەفارە، ٢١ تەنکەری سووتەمەنی، ١٦ تەنکەری ئاو و ١٠ بارهەڵگری رزگارکەر.

فەرماندەی میرەی وەزارەتی پێشمەرگە، عەمید ئەمیر کەریم لە مەراسیمی وەرگرتنی هاوکارییەکاندا رایگەیاند "ئەمڕۆ رۆژێکی گرنگە، ئامادەکاری کراوە بۆ وەرگرتنی هەندێک کەرەستەی سەربازیی وەک هەمەر، تەنکەری ئاو، تەنکەری سووتەمەنی، شۆفڵ و حەفارەی بچووک کە لەلایەن هاوپەیمانان بۆمان دابین کراوە، بەڕێوەبەرایەتی میرەی گشتیی کاری وەرگرتن و رێکخستنی دەکات، ئەم هەنگاوە دەبێتە هۆی پڕچەککردنی لیوا و یەکەکانی وەزارەتی پێشمەرگە کە هەنگاوێکی گرنگە بۆئەوەی توانای سەربازیی و ئەرکی رۆژانەی هێزەکانمان بەرزبێتەوە".

گوتیشی: "بێگومان بەرزکردنەوەی توانای سەربازیی لیواکانی وەزارەتی پێشمەرگە هۆکارێکە بۆئەوەی ئەرکە سەربازییەکانی وەزارەتی پیشمەرگە لە هەموو شوێنەکان بە شێوازێکی زۆر باش بەرێوەبچێت، بەدڵنیایییەوە ئەمە دەبێتە هۆی ئەوەی شێوازی توانای سەربازیی هێزەکانمان بگۆڕین کە ئەمەش هەنگاو و کارێکی زۆر باشە بۆ داهاتوو بۆئەوەی بتوانین وەک حکوومەتی هەرێمی کوردستان و وەزارەتی پێشمەرگە پەرە بە هێزەکانمان بدەین".

دواتریش جێگری سەرۆکی سوپاسالاری پێشمەرگە، عەمید روکن هۆشمەند حەیدەر لە مەراسیمی وەرگرتنی هاوکارییەکاندا لە وتەیەکدا رایگەیاند "سوپاسی رۆڵ و دۆستایەتی هاوپەیمانان دەکەین بۆ ئەو هاوکارییانەی بە مەبەستی پڕچەککردن و پێشکەشکردنی بابەتی لۆجستی بۆ هێزەکانی پێشمەرگە تەرخانیان کردووە کە قۆناغ بە قۆناغ لەگەڵمانن بۆ بەهێزکردن و پڕچەککردن و رێکخستنی تەشکیلاتەکانی وەزارەتی پیشمەرگە، ئێمەش وەک هێزێکی هاوپەیمانی شەڕکەر لە ناوچەکە زۆر سوودمان وەرگرتووە لەو هاوکارییانەی کە لە رابردوو و ئێستادا پێمان دراوە، بۆیە هاوکارییەکانیان بەرز دەنرخێنین و داوادەکەین بەردەوامبن لەو پاڵپشتییانە لە تەواوی بوارە سەربازییە جیاوازەکاندا".

گوتیشی: "پیرۆزبایی لە تەواوی هێزەکانمان دەکەین بەئومێدی ئەوەی سوودبەخش بێت بۆ کاروبارە سەربازییەکان، پێویستە فەرماندەکانمان رێنوێنیی تەواویان بۆ شێوازی بەکارهێنانی دروستی ئامێرەکان هەبێت، کارەکانی تیمی راوێژاکاریی لۆجیستی هاوپەیمانانیش بەرز دەنرخێنین و سوودمان لە رێنوێنییەکانیان بینیوە".

دواتریش گەورە راوێژکاری هێزەکانی هاوپەیمانان لە ھەرێمی کوردستان، عەقید تاد بورز لە رێورەسمەکەدا بەناوی هێزەکانی هاوپەیمانان گوتی: "ئەمڕۆ رۆژێکی گرنگە مایەی شانازییە وەک هێزەکانی هاوپەیمانان لێرە شان بە شانی پێشمەرگە کاردەکەین، رۆژێکی زۆر خۆشە زۆر دڵخۆشم کە ئەمڕۆ لێرە ئامادەم لەنێو وەزارەتی پێشمەرگە دڵخۆشین ئێمە وەک هیزەکانی هاوپەیمان کە هاوکاری وەزارەتی پیشمەرگە دەکەین، ئێمە و پێشمەرگە پێکەوە یەک ئامانج و یەک دوژمنان هەیە تێدەکۆشین بۆ لەناوبردنی ئەو دوژمنە، هیوادارین لە ئایندەش پێکەوە کاربکەین، چونکە بەیەکەوە سەرکەوتووتر دەبین، هاوپەیمانان بەردەوام دەبێت لە هاوکاریکردنی پێشمەرگە بۆ لەناوبردنی داعش، ئەو کەرەستە سەربازییانەی هاوپەیمانان دەیبەخشن بە پێشمەرگە هیوادارین سوودێکی باشی لێ وەربگرن لە داهاتوودا، من لێرە داواکارییەک لە هێزەکانی پێشمەرگە دەکەم، ئەو کەرەستە سەربازییانەی کە ئەمڕۆ وەری دەگرن چۆن مامەڵە لەگەڵ ئوتومبیلەکانی خۆتان دەکەن هیوادارم بە هەمان شێوە مامەڵە لەگەڵ ئەو ئوتومبیلانەش بکەن، بۆئەوەی بتوانن سوودیان لێ وەربگرن و بەشێوەیەکی باش رایان بگرن پێویستە وەک ئوتومبیلی خۆتان حسابیان بۆ بکەن".