پەیامێک لە سەرۆکی پێشووی هەرێمی کوردستانەوە
سەرۆکی پێشووی ھەرێمی کوردستان، مەسعود بارزانی لە پەیامێکدا وێڕای هاوخەمی بۆ بنەماڵە و کەسوکاری سێ ئەندامی خێزانێک کە لە بەغدا کوژران، هاوکات دەستخۆشی لە دەزگا ئەمنییەکانی شاری هەولێر دەکات کە توانییان بە خێرایی تاوانباری سەرەکی تاوانەکە دەستگیر بکەن.
Arbil
هەولێر - AA
سەرۆکی پێشووی ھەرێمی کوردستان، مەسعود بارزانی لە پەیامێکدا وێڕای هاوخەمی بۆ بنەماڵە و کەسوکاری سێ ئەندامی خێزانێک کە لە بەغدا کوژران، هاوکات دەستخۆشی لە دەزگا ئەمنییەکانی شاری هەولێر دەکات کە توانییان بە خێرایی تاوانباری سەرەکی تاوانەکە دەستگیر بکەن.
لە پەیامەکەی مەسعود بارزانی هاتووە: "زۆر بە داخەوە هاووڵاتیی دارا رەئوف كە كوردی دانیشتووی شاری بەغدا بووە خۆی و خێزان و كچەكەی بە شێوەیەكی دڕندانە لە بەغدا شەهید كران".
لە بەشێکی دیکەی پەیامەکەیدا، مەسعود بارزانی وێڕای سەرەخۆشی لە بنەماڵە و کەسوکاری کوژراوەکان، دەستخۆشی لە دەزگا ئەمنییەکانی شاری هەولێر کردووە کە توانییان بە خێرایی تاوانباری سەرەکی تاوانەکە دەستگیر بکەن و تیایدا هاتووە "وێڕای ئەوەی بە توندی ئیدانەی ئەو تاوانە دەكەم سەرەخۆشی لە بنەماڵە و كەسوكاری دارا رەئوف دەكەم. هەروەها دەستخۆشی لە هەوڵ و ماندووبوونی دەزگا ئەمنییەكانی شاری هەولێر دەكەم كە توانیان خێرا تاوانباری سەرەكیی ئەم تاوانە ئاشكرا بكەن و دەستگیری بكەن".
ئێوارەی دوێنێ سێشەممە، سێ ئەندامی خێزانێکی کورد لە ماڵەکەی خۆیاندا لە ناوچەی مەنسور لە شاری بەغدا کوژران.
ئەمڕۆ چوارشەممە، دژە تیرۆری کوردستان دەستگیرکردنی ئەنجامدەری ئەو تاوانەی راگەیاند.
