عێراق ــ AA

لە سەرانسەری عێراق، هەڵمەتی بانگەشەی هەڵبژاردن بۆ خوولی شەشەمی ئەنجوومەنی نوێنەرانی عێراق کە بڕیارە لە ١١ی تشرینی دووهەم بەڕێوە بچێت، بە فەرمی کۆتایی پێ هات.

بەو پێیە لە کاتژمێر ٧ی بەیانی ئەمڕۆ شەممەوە، هەرچەشنە چالاکی، پڕۆگرام و یان میتینگێکی جەماوەری بەربژێرەکان بە بانگەشە بۆ لیست و قەوارەکانیان هەژمار دەرکرێت و بە لادان لە بڕیاری کۆمسیۆنی باڵای سەربەخۆی ھەڵبژاردنەکانی عێراق دادەنرێت.

هەڵبژاردن بۆ دیاریکردنی ئەندامانی خوولی شەشەمی ئەنجوومەنی نوێنەرانی عێراق بڕیارە لە ١١ی تشرینی دووهەمی ئەمساڵ بەڕێوە بچێت.

لەم بارەیەوە گوتەبێژی کۆمیسیۆنی باڵای سەربەخۆی ھەڵبژاردنەکانی عێراق، جومانە غەللای بۆ ئاژانسی ئانادۆڵو ڕایگەیاندبوو: "کۆمیسیۆن ئامادەکارییەکانی تەواوی کردووە بۆ ئەوەی دەنگدانی تایبەت بۆ ھەڵبژاردنی ئەنجوومەنی نوێنەران لە ٩ی ئەم مانگە و دەنگدانی گشتی لە ١١ی ئەم مانگە، ئەنجام بدات".

- هەڵبژاردنی ئەنجوومەنی نوێنەرانی عێراق

لە هەڵبژاردنی خوولی شەشەمی ئەنجوومەنی نوێنەرانی عێراق ٢١ ملیۆن و ٤٠٤ ھەزار و ٢٩١ دەنگدەر مافی دەنگدانیان ھەیە، حەوت ھەزار و ٧٦٨ بەربژێر لە ١٨ پارێزگای عێڕاق (سلێمانی و هەڵەبجە یەک بازنەیە) ڕکابەری یەکتر دەکەن بۆ بەدەستھێنانی ٣٢٩ کورسی ئەنجوومەنەکە.

لە هەڵبژاردنەکەدا ١٤٦ هاوپەیمانی و پارت و کەسایەتی سەربەخۆ کێبرکێ دەکەن بۆ بەدەستهێنانی ٣٢٩ کورسی کە ٨٣یان کۆتای ژنانن.

هەرێمی کوردستان ٤٦ کورسی بۆ دیاری کراوە و لەم هەڵبژاردنەدا بەربژێرەکانی پارێزگای هەڵەبجە لە چوارچێوەی بازنەی سلێمانیدا بەشداری هەڵبژاردن دەبن.

پێکهاتەکان لە عێراقیش بە پێی یاسای ژمارە (٤)ی هەمواری سێیەمی یاسای ئەنجوومەنی نوێنەران کە لە ساڵی ٢٠٢٣ دا پەسەند کراوە، خاوەنی ٩ کۆتا دەبن لە هەڵبژاردنەکاندا کە بەم شێوەیە دەبێت: پێکهاتەی کریستیان یەک کورسییان لە هەر کام لە بازنەکانی بەغدا، کەرکووک، نەینەوا، دهۆک، هەولێر دەبێت. هاوکات لە بازنەی بەغدا، پێکهاتەی سائی یەک کورسی، کەمینەکانی شەبەک و ئێزدی لە نەینەوا هەرکام یەک کورسی و فەیلییەکانیش لە واست یەک کورسی کۆتایان دەبێت.

هەرکام لە بەرژێرەکانیش بە پێی یاسا تەمەنیان نابێت لە ٣٠ ساڵ کەمتر بێت و مەرجە خاوەنی بڕوانامەی بکالۆریۆس بن، بەڵام بۆ کۆتاکان لە ئامادەیی کەمتر نەبێت.

لە هەڵبژاردنی خوولی شەشەمی ئەنجوومەنی نوێنەرانی عێراق ٢١ ملیۆن و ٤٠٤ هەزارو ٢٩١ كەس مافی دەنگدانیان هەیە کە ١٨ ملیۆن و ٣٣٥ هەزار و ٨٨٠ کەسی لە ١٥ پارێزگای عێراقدان و سێ ملیۆن و ٦٨ هەزار و ٤١١ كەسی لە سێ پارێزگاکەی هەرێمی کوردستاندا مافی دەنگدانیان هەیە.

بە پێی هەمواری سێیەمی یاسای ئەنجوومەنی نوێنەران و ئەنجوومەنی پارێزگاکان، لە هەڵبژاردنی ئەمساڵدا هەر پارێزگایەک بازنەیەکی هەڵبژاردن دەبێت (سلێمانی و هەڵەبجە یەک بازنەیە) و ژمارەی کورسییەکانی هەر پارێزگایەک بەو پێیە دەبێت: