سياسەت, عێراق

هەرێمی کوردستان بڕیارە نایاساییەکانی تایبەت بە پلەبەرزکردنەوە و خانەنشینی فەرمانبەران هەڵدەوەشێێتەوە

لەبارەی وردەکارییەکانی تایبەت بە راژەی فەرمانبەران و خانەنشینان، وەزارەتی دارایی هەرێمی کوردستان رێنمایی تایبەتی دەرکرد.

30.06.2020
هەرێمی کوردستان بڕیارە نایاساییەکانی تایبەت بە پلەبەرزکردنەوە و خانەنشینی فەرمانبەران هەڵدەوەشێێتەوە

Arbil

هەولێر - AA

وەزارەتی دارایی و ئابووری حکوومەتی هەرێمی کوردستان رێنمایی ژمارە ١٢ و ١٣ی تایبەت بە یاسای چاکسازی خستەبواری جێبەجێکردنەوە و گشتاندنی بۆ هەموو فەرمانگەکانی حکوومەت کردووە بە مەبەستی جێبەجێکردنی.

بەپێی رێنماییەکە هەر پلەیەک بەدەر لەیاسا درابێتە فەرمانبەرانی حکوومەتی هەرێمی کوردستان هەڵدەوەشێتەوە و پلەی شایستە بەخۆی پێ دەدرێت و هیچ خزمەتێکیش بۆ هیچ فەرمانبەرێک هەژمار ناکرێت ئەگەر بەدەر لەیاسا پێشتر بۆی هەژمار کرابێت و دەبێت لە چوارچێوەی یاسای کارپێکراو رێکبخرێنەوە.

رێنماییەکان ئاراستەی هەموو وەزارەتەکانی حکوومەت و فەرمانگەکانی نەبەستراو بە وەزارەت کراوە و تیایدا هاتووە هەموو دامەزراوەکان پێداچوونەوە و رێکخستنەوە بۆ مووچە و پلە و ناونیشانی هەموو مووچەخۆران بکەن، رێکخستنەوەکانیش بەپێی ساڵی خزمەتی راستەقینە و بڕوانامە و ئەو خزمەتە دەبێت کە بەپێی یاسا بەرکارەکان هەژمارکراوە.

رێکخستنەوەکە هەموو مووچەخۆرانی حکوومەت لەبواری خزمەتی شارستانی و پێشمەرگایەتی و هێزەکانی ئاسایش و ناوخۆ دەگرێتەوە و لەسەر هەموویان جێبەجێ دەکرێت.

رێنماییەکانی وەزارەتی دارایی و ئابووری هەروەها فەرمانی پێویستیشی لەبارەی خانەنشینانەوە تێدایە و داواکراوە لەسەر بنەمای شایستەبوونی دارایی و پشتبەستوو بە فۆرمی بایۆمەتری حکوومەتی هەرێم، مافی خانەنشینی هەژمار بکرێت و لەم بارەیەوە بەڕێوەبەرایەتی گشتی خانەنشینی لێژنەی تایبەت پێکدەهێنت.

رێنماییەکان کە بە واژووی وەزیری دارایی و ئابووری هەرێمی کوردستان ئاوات جەناب نووری بڵاوکراوەتەوە، جەخت لەوە کراوەتەوە کە ئەم رێنماییانە لە رۆژی دەرچوونیانەوە کاری پێدەکرێت و لە رۆژنامەی فەرمی هەرێمی کوردستان بڵاودەکرێتەوە.


------

------


ماڵپەری ئاژانسی ئانادۆڵۆ، بەشێک لەم هەواڵە ئابۆنانەی کە بڵاوکراوەتەوە لە لیستی هەواڵەکانی ئاژانسی ئانادۆڵۆ، کورت و پوخت دەکرێت ئینجا بڵاودەکرێتەوە، بۆ ئابۆنەوە کردن تکایە پەیوەندی بکەن.
بابه‌ته‌ په‌یوه‌ندیداره‌كان
Bu haberi paylaşın