ئەنقەرە - AA

وەزیری دەرەوەی ئێران، عەباس عێراقچی لە پەیامێکدا بۆ سەرۆکی ئەمریکا، دۆناڵد ترەمپ کە هەڕەشەی ئەنجامدانی هێرشی سەربازیی لە وڵاتەکەی دەکات، ڕایگەیاند: "ئەو هەڵەیەی لە مانگی حوزەیراندا کردتان دووبارەی مەکەنەوە"، پەیامی ئەوەشی دا کە ئێران بۆ دیپلۆماسیی ئامادەیە.

لە لێدوانێکدا بۆ کەناڵی فۆکس نیوز-ی ئەمریکی، عێراقچی هەڵسەنگاندنی بۆ ڕووداوەکانی ناو ئێران، هەڕەشەکانی ترەمپ و گرژییەکانی لەگەڵ ئەمریکا کرد.

عێراقچی ئاماژەی بەوە کرد حکوومەتی ئێران هەموو ڕێوشوێنێکی گرتووەتە بەر بۆ دانبەخۆداگرتن بەرامبەر ئەو کردە توندوتیژی و تیرۆریستییانەی لە کاتی خۆپیشاندانەکاندا ڕوویاندا و، گوتی: "دوای تێپەڕبوونی سێ ڕۆژ بەسەر کردە تیرۆریستییەکاندا، ئێستا ئارامیی باڵا دەستە و، کۆنترۆڵ بەتەواوی لەدەستی ئێمەدایە".

لە وەڵامی پرسیارێکدا سەبارەت بە ژمارەی ئەو کەسانەی لە کاتی ڕووداوەکاندا کوژراون، عێراقچی ڕایگەیاند: "ئەو تیرۆریستانەی لە دەرەوەی وڵات ئاڕاستە دەکران، تێکەڵی خۆپیشاندانەکان بوون و تەقەیان لە هێزە ئەمنییەکان و خەڵک کرد. شانەی تیرۆریستیی هەبوون. هاتنە ژوورەوە و ئۆپەراسیۆنی تیرۆریستیی شێوازی داعشیان بەکارهێنا. ئەفسەرانی پۆلیسیان بە زیندویی سووتاند. سەریان بڕین. دەستیان کرد بە تەقە کردن لە پۆلیس و خەڵک. لە ئەنجامدا بۆ ماوەی سێ ڕۆژ لەگەڵ تیرۆریستان جەنگاین نەک لەگەڵ خۆپیشاندەران".

عێراقچی باسی لەوە کرد کە تیرۆریستان ویستوویانە لە ڕێگەی تەقەکردن لە خۆپیشاندانەکان و زیادکردنی ژمارەی کوژراوان، ترەمپ پەلکێشی جەنگ بکەن و، گوتی: "ئەمە بەتەواوی پلانێکی ئیسرائیل بوو. ویستیان سەرۆکی ئەمریکا تێوەگلێنن لەم ململانێیەدا. لەبەرئەوە لە ڕێگەی کوشتنی خەڵکی ئاسایی، کوشتنی ئەفسەرانی پۆلیس و نانەوەی جۆرێک لە شەڕ لە شارە جیاوازەکاندا، دەستیان کرد بە زیادکردنی ژمارەی کوژراوان".

لە وەڵامی پرسیارێکدا سەبارەت بەوەی کە ئایا پەیامی بۆ ترەمپ هەیە کە هەڕەشەی هێرشی سەربازی لە ئێران دەکات، عێراقچی بە ئاماژەدان بە هێرشەکانی ئیسرائیل و ئەمریکا لە حوزەیرانی ٢٠٢٥ ڕایگەیاند: "پەیامی من ئەوەیە، ئەو هەڵەیەی لە مانگی حوزەیراندا کردتان دووبارەی مەکەنەوە. دەزانن کە ئەگەر ئەزموونێکی سەرنەکەوتوو تاقی بکەنەوە، هەمان ئەنجامتان دەستدەکەوێت. دەزانن کە لە مانگی حوزەیراندا دامەزراوەکانتان لەناوبرد، بەڵام تەکنەلۆجیا بۆردومان ناکرێت، ئیرادەش بۆردومان ناکرێت. ئێران سەلماندی ئامادەی دانوستان و دیپلۆماسییە. لە نێوان جەنگ و دیپلۆماسییدا، دیپلۆماسیی ڕێگایەکی باشترە. هەرچەندە ئەزموونێکی ئەرێنیمان لەلایەن ئەمریکاوە نییە، بەڵام دیپلۆماسیی زۆر لە جەنگ باشترە".