ئیستانبوڵ ــ AA

بە ئاراستەکردنی دوو فڕۆکەی بێفڕۆکەوانی، پاڵاوگەیەکی کۆمپانیای نەوتی سعوودیە "ئارامکۆ" لە شاری ڕەئس تەنورە ڕۆژھەڵاتی ئەو وڵاتە، کرایە ئامانج.

کۆمپانیای نەوتی سعوودیە "ئارامکۆ" بە گەورەترین کۆمپانیای نەوت لەجیھاندا دادەندرێت.

کەناڵی عەربییە بڵاویکردەوە کە گوتەبێژی بەرگریی سعوودیە، لیوا تورکی مالیکی ڕایگەیاندووە، دوو فڕۆکەی بێفڕۆکەوان، ئاراستەی پاڵاوگەیەکی کۆمپانیای نەوتی "ئارامکۆ" لە شاری ڕەئس تەنورە کراون.

ئاماژەی بەوەشداوە کە فڕۆکە بێفڕۆکەوانەکان، لەلایەن ھێزی بەرگریی ئاسمانی سعوودیە تێکشکێندراون و خراونەتە خوارەوە.

باسی لەوەش کردووە کە لە کاتی تێکشکاندنی فڕۆکە بێفڕۆکەوانەکان، چەند پارچەیەکی فڕۆکە بێفڕۆکەوانەکان لە پاڵاوگەکە کەوتوونەتە خواروە کە بەھۆیەوە ئاگر لە پاڵاوگەکە کەوتووەتە و دوو کەسی مەدەنیش برینداربوون.

ھاوکات بەپێ چەند گرتەیەکی ڤیدیۆیی کە لە تۆڕە کۆمەڵایەتییەکاندا بڵاوکرانە، ئەو دەبیندرێت کە دووکەڵێکی زۆر لە پاڵاوگەکە بەرزدەبێتەوە.