سلێمانی-AA

بەبۆنەی یادی مەولودی پێغەمبەری ئیسلام محەمەد (د.خ) و وەک کاردانەوەیەک بەرامبەر بێڕێزێیەکانی فەڕەنسا بە پێشەوای موسڵمانان لە هۆڵی رۆشنبیری شاری سلێمانی کەرنەڤاڵی ''سڵاوێک لە سەروەرمانەوە'' بەڕێوەچوو.

لە کەرنەڤاڵەکەدا کە چەندین بەرهەمی هونەری و کولتووری نیشان درا، دواتر گوتارێک خوێندرایەوە و بەتوندی ئیدانەی ئەو بێڕێزیانە کران کە لە ماوەکانی پێشوودا کرانە سەر پێشەوای مرۆڤایەتی پێغەمبەری ئیسلام محەمەد (د.خ) لە فەڕەنسا.

''پێغەمبەری خۆشەویست هەمیشە لە سەنگەردایە، هەمیشە دوژمن بەزێنە، هەمووکات فوو دەکات بەم میللەتەدا کە هەڵسن و راپەڕن و زیندوو ببنەوە، هەردەم شەیدایان و دڵسۆزانی لە چواردەوری کۆبوونەتەوە و بە چاوساغی خۆیانی دەزانن. بۆیە دوژمنەکانی هەمیشە لە ناحەزی خۆیانا لە دۆڕاوییانا، تیری تێدەگرن و وادەزانن بەمە ئوممەتەکەی دەبەزێنن و خۆیان سەردەکەون، ئەوانە هەموو دەستیان خوێناوییە، مێژوویان پڕە لە کوشتن و بڕین و کوشتنی دانا و زانا لە تاڵان و بڕینی ئەفریقییەکان و بەکۆیلەکردنیان، لێرە و لەوێ لە داخی ئیسلام نازانن چی دەکەن، بەداخەوە خۆیان سەرقاڵی لێدانی ئیسلام دەکەن، نازانن بەو تیر و شیرانەیان، ئوممەتی ئیسلام زیاتر بەئاگا دێتەوە و لە خەوی غەفڵيت رادەپەڕێت و دەزانێت کێ دۆستە و کێ دوژمنە".

مامۆستا سەید ئەحمەد پێنجوێنی رایگەیاند "موسڵمانان تا ئەم کاتە سەرقاڵی پرسە بچووک و میللیەکانی خۆیان بوون، بەڵام ئەم ماکرۆن-ە نەفامە توانی موسڵمانان زیندووبکاتەوە و لە خەوی غەفڵەت رایانپەڕێنێ، ئەوان دەڵێن موسڵمانان تیرۆریستن، فەرموو ئەوە ئێمە بە شێوەیەکی مەدەنییانە بەرامبەر ئەوان دەوەستینەوە و کاڵاکانیان بایکۆت دەکەین، بەچۆکیاندا دادەین و توانیومانە ملیۆنەها دۆلار زیانیان لێ بدەین، بۆیە ئافەرین بۆ موسڵمانان کە بایکۆتی هەموو بەرهەمێکی ئەوان دەکەن، داوا دەکەم کە چیتر لەمەودوا خۆمان بەرهەممان هەبێت، ئێمەش وەک باووباپیری خۆمان پێڵاو و جلوبەرگ و کەلوپەلی خۆمان بەرهەمبهێنین و نەبینە پاشکۆی ئەوان، ئەگەر بەنیازبین ئەوان تاج بکەنەسەرمان، ئەوا هەردەم وەک کۆیلەی ئەوان دەمێنینەوە، بۆیە ئەگەر ئێمە لەدوای پێغەمبەرەوە بڕۆین سەردەکەوین بەسەر دوژمنەکانماندا".