سياسەت, اخبار تجزیه و تحلیل, عێراق

مەترسی سەرهەڵدانەوەی داعش.. هۆشداری کورد و نیگەرانییەکانی حکوومەتی عێراق

شاخەوان عەبدوڵڵا: - “گومان هەیە لە ئۆپەراسیۆنەکانی حەشد و سوپا دژ بە داعش لە هەندێک ناوچەی عێراق، کە بە سەدان چەکداری داعشی تێدابوو”. - “چوارسەد خێزانی تورکمان لە دوای رووداوەکانی ١٦ی ئۆکتۆبەر لە کەرکووک ئاوارە بوون”.

Fakhradin Ibrahim Mohammad   | 20.06.2020
مەترسی سەرهەڵدانەوەی داعش.. هۆشداری کورد و نیگەرانییەکانی حکوومەتی عێراق

Arbil

هەولێر - AA

سەرهەڵدانەوەی داعش، تەنیا گەریمانەیەکی ئەمنی نییە بەڵکوو بە واقع جموجۆڵەکانی ئەم دواییەی لە هەندێک ناوچە، ئەو نیگەرانییەی لای هەرێمی کوردستان دروستکردووە کە بە ئاشکرا لەسەر ئاستی سەرۆکایەتی هەرێم، پەرلەمان و سەرۆکوەزیران، لەبارەی دۆخی هەندێک ناوچەی عێراق بە تایبەتی ناوچە ناکۆکی لەسەرەکان لە نێوان بەغدا و هەولێر هێنایە دەنگ و بە دەرکردنی بەیاننامە، وێڕای هۆشداریدان لە پەرەسەندنی تیرۆریزم، حکوومەتی عێراقیان لێ ئاگادار کردووەتەوە.

رێکخستنە چەکدارییە نهێنییەکانی داعش رۆژانە پەلاماری نەک تەنیا هێزە ئەمنییەکان دەدەنە، بەڵکوو جوتیاران و دەغل و دانیشیان لە دەستی هێرشەکانیان پارێزراو نین و گەیشتووەتە ئەو ئاستەی کە بە گوتەی شایەتحاڵان بتوانن لە بۆشایی ئەمنی هەندێک ناوچە کەڵک وەربگرن و کۆنترۆڵی ناوچەکە بکەن.

یەکێک لە هەستارترین شوێنەکان کە داعش بە بەردەوامی چاوی لەسەر بووە، کەرکووک بووە.
کەرکووک بە هۆی هەڵکەوتە جوگرافییەیەکە، بۆشایی ئەمنی، ناکۆکی نێوان دەسەڵاتی بەغدا و هەرێم لەسەر، چەقی ململانییە چەکدارییەکان بووە و هەموو هەوڵەکان بە ئاراستەی ئاساییکردنەوەی دۆخێکە کە بە تایبەتی دوای ریفراندۆمی کوردەکان بۆ جیابوونەوە لە عێراق لە ساڵی ٢٠١٧، زیاتر گرژی تێکەوت.

شاخەوان عەبدوڵا، کەسایەتییەکەی سیاسی دیاری کەرکووکە، لە لایەن پارتی دیموکراتی کوردستان نوێنەرایەتی ئەو لێژنەیە دەکات کە لە ژێر چاودێری نەتەوە یەکگرتووەکان کار دەکات بۆ ئاساییکردنەوەی دۆخەکە.
بە گوتەی شاخەوان عەبدوڵا، هەوڵی لێژنەکە، نەهێشتنی تیرۆرە لە رێگەی گەڕاندنەوەی سەقامگیری سیاسی و ئیداری و بۆ ئەو پارێزگایە.

لە دیمانەیەکدا لەگەڵ ئاژانسی ئانادۆڵو، شاخەوان عەبدوڵا کە پێشتر ئەندامی لێژنەی بەرگریی و ئاسایشی ئەنجوومەنی نوێنەرانی عێراق بووە، درووستبوونی داعش و شانە نووستووەکانی کە کەرکووک، قۆناغ بە قۆناغ باس دەکات، ئەو هەڵسەنگاندن بۆ درووستبوون، پەرەسەندن و دەستبەسەرداگرتنی هەندێک ناوچە لە لایەن ئەر رێکخراوە تیرۆریستییە، رۆڵی ئەمریکییەکان لە سیستەمی بەرگری عێراق، هەروەها کاری لێژنەی ئاساییکردنەوەی دۆخی کەرکووک دەکات. 

شاخەوان عەبدوڵا دەڵێت: “دۆخی ئەمنی ناوچە دابڕاوەکانی هەرێمی کوردستان دەکرێت لە سێ قۆناغی جیاواز هەڵسەنگاندنی بۆ بکرێت، ئەویش، دوای رووخانی رژێم تا هاتنی داعش، قۆناغێک دوای هاتنی داعش تا ساڵی ٢٠١٧ و قۆناغی سێیەم، قۆناغی دوای ساڵی ٢٠١٧ بوو.
لە دوای ساڵی ٢٠٠٤ و ٢٠٠٥، دوای رەتکردنەوەی سوننە بۆ بەشداریکردن لە پڕۆسەی سیاسی، زەمینەیەکی ناڕەزایەتی درووستکرد لە ناوچەکانیان و بووە هۆی پەرەسەندنی گرووپە و رێکخراوە تیرۆریستییەکان. بەعسییەکان خۆیان لە گرووپی نەقشبەندییەکان بینییەوە و بەشێکیشیان بوون بە قاعیدە و ئەنسارولسوننە درووست بوو. ئەم گرووپانە دەستیان بە تەقینەوە و کاری خۆکووژی کرد و چالاکییەکانیان لە دژی ئەمریکییەکان بوو و لە هەمانکاتیش دژی حکوومەتی ناوەندی وەستانەوە و پێیان وابوو کە ئەم حکوومەتە هاوکاری داگیرکەرانە. پۆلیسیان دەکووشت، ئاسایشیان دەکووشت”.


- گومان هەبوو دەستێکی دەرەکی داعشی هێنایە عێراق

شاخەوان عەبدوڵا لەو باوەڕەدایە کە دەستێکی دەرەکی لە پشت داعش بوو لە هێنانیان لە سووریاوە بۆ عێراق و دەڵێت: “بەشێکی زۆری شارەکانی سووریا کەوتبووە ژێر دەستی داعش و دەسەڵاتی سووریا نزیک بوو لە رووخان، بەشێکی زۆری شارەکانی کەتبوون و داعش تەنگی بە رژێمی سووریا هەڵچنیببوو. بۆیە گومانی ئەو هەبوو کە دەستێکی سیاسی داعشی هێنا بۆ عێراق بۆ ئەوەی ئەو گوشارانە لەسەر رژێمی سووریا نەمێنێ و داعش داخلی عێراق بوون”. 

بە گوتەی شاخەوان عەبدوڵا کە ئەو کات ئەندام بووە لە لێژنەی بەرگریی و ئاسایش و ئەرکی لێکۆڵینەوە و نووسینی راپۆرتی تایبەت بووە لەسەر کەوتنی مووسڵ کە دووهەم شاری عێراق بوو، خەلافەتەکەی داعشی تێدا راگەیەندرا، تەنیا ٣٠٠ چەکداری داعش کە پێشتر مەشقیان پێکرابوو، هێرشیان کردووەتە سەر مووسڵ و هەر ئەو ٣٠٠ کەسە توانیویانە شۆڕشێکی جەماوەری درووستبکەن و پشتیوانی خەڵکانیێکیان بەدواداهات.

ئەو دەڵێت: “خەڵکی مووسڵ و دەورووبەری پێیان وابوو داعش فریادرەسیانە و پێیان وابوو ئەو زووڵمەی لە لایەن و هێزە ئەمنییەکانیان و میلیشیاکانەوە کە پێیان دەگوترا هێزی سەفەوی و سەرانەیان لێوەردەگیرا و کوڕیان لێ دەبردرا و دواییش تاوانی تیرۆریان دەخستنە پاڵ، بووە هۆی ئەوەی کە پێیان وابوو رزگاریان دەکات. بۆیە خۆیان تەسلیمی داعش کرد و ئەو هەڵستانە جەماوەرییە وایکرد کە زۆریی هێزە ئەمنییەکانیش نەتوانن پێشیان پێ بگرن، کە تەنها لە ناو مووسڵ ٦٥ هەزار کەسی ئەمنی و سەربازیی هەبوون”.


- ئێران و ئەمریکا یەکتر بە پشتیوانی داعش تۆمەتبار دەکەن

ئەو قسانەی شاخەوان عەبدوڵا پرسیاری ئەوە درووست دەکات، ئاخۆ هێزێکی ٣٠٠ کەسی چۆن و بە چ پشتیوانییەک دەتوانن بەشێکی گەورە لە عێراق و سووریا داگیر بکەن. لەبارەی پشتی پەردەی یارمەتییەکانی داعش لە هەندێک ناوچەی عێراق، شاخەوان عەبدوڵا بە گومانەوە سەیری ئۆپەراسیۆنەکانی حەشدی شەعبی دەکات و دەڵێت، “لە ئێستادا بەرەی ئێران دەڵێ ئەمریکا لە پشت داعشە و بەرەی بەرامبەریش ئێران بە پشتیوانی داعش ناو دەبات. هەر دوو لاش فاکتی خۆیان هەیە و بۆ نموونە لە ناوچەیەک وەک قوریچای لە نێوان کفری و دووز، ئەو ناوچەیە هێزی عێراقییە و حەشدی شەعبی لەوێ دەتوانن کۆنترۆڵی بکەن و ئازادی بکەن، بۆ نایکەن؟ ئەو ناوچانە لە ژێر دەسەڵاتی ئەمریکی نییە. بەڵام ئەمریکا تا ئێستا پشتیوانی لە پرۆسەی سیاسی لە عێراق دەکات و پشتیوانی بۆ کازمیش دەربڕیوە و پێویست ناکات کە پشتیوانی داعشیش بێت”.  

هەروەها ئۆپەراسیۆنی سوپای عێراق لە دوایین بنکەی داعش واتە ناوچەکانی باشووری کەرکووک بۆ شاخەوان عەبدوڵا جگای گومانە و نایشارێتەوە کە ئاگاداری ئەوە نییە لە چوار هەزار چەکداری رێکخراوەکە چەند کەس گیراوە یان کوژراوە و دەڵێت: “سوپای عێراق بەر لە ١٦ ئۆکتۆبەر ئۆپەراسیۆنێکی لە ناوچەکانی حەویجە ئەنجامیان دا و بە پێی راپۆرتەکانی ئێمە وەک لێژنەی ئاسایش و بەرگری کە بەرزمان کردەوە بۆ فەرماندەی هێزەکان کە عەبادی بوو، حەویجە دوایین ناوچەی عێراق بوو کە لە داعش پاککرایەوە و چوارهەزار چەکداری تێدا بوو، بەڵام دوای ئۆپەراسیۆنەکە یەک داعش نە دەستگیر کرا و نە کوژرا. کەواتە ئەو داعشانە بۆ کوێ چوون؟ مانەوەی ئەو چەکدارانە و بوونی بۆشایی ئەمنی لەو ناوچانە بۆتە هۆکاری ناسەقامگیری ئەمنی”.


- یەکەم رووبەڕووبوونەوەی داعش
ئەو ئەندامەی پێشووی لێژنەی ئاسایش و بەرگری پەرلەمانی عێراق باس لە یەکەم رووبەڕووبوونەوەی داعش دەکات دوای ئەو هەموو پێشرەوییەکەی کە چەکدارانی رێکخراوەکە کردبوویان و دەڵێت، “پڕۆژەیەکی ئەمریکییەکان هەبوو کە ناوچە کوردستانییەکانی دەرەوەی هەرێمی کوردستان بە هاوبەشی لە لایەن هێزەکانی پێشمەرگە و سوپاسی عێراقەوە بپارێزرێت، بڕیار درا کە لە کەرکووک بەشی باشوور و رۆژئاوای باشوور بکەوێتە دەست سوپای عێراق و  باکوور و رۆژهەڵاتی کەرکووکیش کەوتە دەست هێزەکانی پێشمەرگە و تا ٢٠١٤ ئەو دۆخە بەو شێوەیە بوو و تا ئەو کاتەی کە سوپای عێراق لە ناوچەکانی خۆی داڕما و چۆلیان کرد و مەترسی هات و گەیشتە شەریکەی غازی کەرکووک کە تەقینەوەی یان دەست بەسەردارگرتنی کاریگەری لەسەر هەموو کوردستان  و ناوچەکەش دەبوو. بۆیە پێشمەرگە و خەڵکی ناوچەکە بەپەلە رووبەڕووی داعش بوونەوە و ئەوە یەکەم رووبەرووبوونەوەی داعش بوو و لە مەخمووریش پێشمەرگە رووبەڕوویان بوویەوە و بەو شێوەیە پێشمەرگە بڕیاری دا کە ناوچەکانی خۆی بپارێزێت و بۆیە هەزاران شەهید و بریندارمان دا بۆ ئەوە کەرکووک، خورماتوو، مەخموور نەکەوێت، شنگال کەوت بەڵام بە خوێنی پێشمەرگە رزگار کرایەوە”. 
شاخەوان عەبدوڵا دەشڵێت، هاوکات لەگەڵ رووبەڕووبوونەوەی داعش، کێوماڵکردنی شارەکانیش دەستی پێکرد و دەزاگاکانی ئاسایش و دەزگاکانی تری هەواڵگری دەستین بە دەستگیرکردنی ئەوانە کرد کە پەیوەندییان بە رێکخراوەکە هەبوو و ئاساشی ئەو ناوچانە هاوشێوەی ناوچەکانی دیکەی هەرێمی کوردستان پارێزرا.

- تێکچوونی دۆخی ئاسایشی کەرکووک 

شاخەوان عەبدوڵا هۆکاری تێکچوونی دۆخی ئەمنی کەرکووک لە ئێستادا بۆ ئەوە دەگەڕێنێتەوە کە هەوێنی رێکخراوە تیرۆریستییەکان کە خەڵکی ناوچەی حەویجە و رەشاد و ریاز بوون، دەستیان بەسەر شارەکە داگرتووە و نموونەش بۆ قسەکەی دێنێتەوە کە “هەر ئەمڕۆ حەویجەییەک پارێزگارە، قایمقامە و بە دڵی خۆیان هەڵسوکەوت دەکەن” و دەڵێت: “دوای ریفراندۆم و خیانەتی ١٦ی ئۆکتۆبەر، هێزێکی کوردی لە ژێر فشاری لایەنێکی ئیقلیمی بە شێوەیەک لە شێوەکان بۆ دەستبەسەرداگرتنی نەوتی کەرکووک، رێککەوتنێکی وایان کرد کە کەرکووکیان لە ژێر دەستی پێشمەرگە دەرهێنا و لە دوای ئەو بەروارەوە رەوشی ئەمنی کەرکووک بەرەو تێکچوون چوو”.  


- ٤٠٠ خێزانی تورکمان لە کەرکووک ئاوارە بوون

لە دوای ١٦ ئۆکتۆبەر کە دەسەڵاتی عێراقی باڵی بەسەر کەرکووکدا کێشاوە و پێشمەرگە دوای پێکدادان لەگەڵ سوپا و حەشد، لەو ناوچەیە کشاونەتەوە، تورکمانەکانیش بەشێک بوون لە قوربانی ئەو پێکدادانانە و وەک شاخەوان عەبدوڵا باسی دەکات دەیان خێزانی تورکمانی ئەو شارە بە ناچار ناوچەکەیان جێهێشتووە.
لەم بارەیەوە شاخەوان عەبدوڵا جەخت لەوە دەکاتەوە کە بە پێی ئەو داتایەی لەبەردەستێتی، چوارسەد تورکمان ناوچەکەیان جهێشتووە.  


- ئاساییبوونەوەی دۆخی کەرکووک بە هۆی خۆپیشاندانەکانی بەغدا تێکچوو

دۆخی کەرکووک دوای ئەو هەموو ئاڵۆزیانە، لە ئەگەری رێککەوتنێک، یەکەم لە نێوان هێزە کوردییەکان خۆیان و دوایی هەرێمی کوردستان و بەغدا نزیک بوو. لە گوتەکانی شاخەوان عەبدوڵا دەردەکەوێت کە پارتی دیموکراتی کوردستان و یەکێتی نیشتمانی کوردستان کە دوو هێزی سەرەکین لە هەرێم، بەیەکەوە بەشداری کۆبوونەوە و ئەندامێتیان لە لێژنەکان کردووە بۆ ئاساییکردنەوەی کەرکووک و لەم بارەییەوە ئاشکرای دەکات لە خۆپیشاندانەکانی عێراق پەکی پڕۆسەکەی خستووە و دەڵێت: “لێژنەی ئاساییکردنەوەی دۆخی کەرکووک کە لە لایەن سەرۆکی نێردەی نەتەوە یەکگرتووەکانەوە سەرپەرشتی دەکرێت و خاتوو پلاسخار خۆی چاودێری دەکات، لای پارتی من و لای یەکێتی کاک خالید شوانی بەشدار بووین”. زۆر لێژنەیەکی گەورە و سەرکەوتوو بوو چونکە هەموو مەلەفەکانی ئیداری، ئەمنی و سەربازیی تاوتوێ دەکرد و جیا لەوەش لێژنەیەکی حکوومیش هەبوو کە هەردوو لێژنەکە پەیوەندیمان هەبوو و هەموو رێککەوتنێک کرا و بڕیار بوو مانگی ٩ (ئەیلوولی ٢٠١٩) واژووی بکەین، و حکوومەتی عێراق و هەرێمیش گەیشتنە رێککەوتن بۆ دروستکردنی هێزێکی هاوبەش لە کەرکووک بەڵام قەیران لە عێراق درووست بوو و عادل عەبدولمەهدی دەستی لەکار کێشایەوە و ستافی نووسینگەکەشی کە ئەندام بوون لە لێژنەکان نەمان و بۆیە رێککەتنەکە نەچووە بوای جێبەجێ کردن و تا ئێستاش هەر ماوە”.

شاخەوان عەبدوڵا جەخت لەوەش دەکاتەوە کە ئەستەمە لە خاڵی سفرەوە دەست پێبکرێت و رێککەوتن کراوە و تەنیا ماوەتەوە کە رابگەیەندرێت.

بەپێی رێککەوتنەکە وەک شاخەوان عەبدوڵا باسی کرد، بڕیار دراوە کە بارەگای حزبەکان هەموو بگەڕێتەوە و پاسەوانی خۆیان هەبێت و پێویست بەوە نەبێت خەڵکی باشوور و ناوڕاستی عێراق بیانپارێزێت. ئەو گوتیشی: “بە بێ چەک ناگەڕێینەوە و بۆیە بڕیار درا کە هیچ هێزێکی لێ نەبێت و فیرقەیەک درووست بکرێن لە هەموو پێکهاتەکانی شارەکە و تا ئەو کاتیش هەموو هێزەکانی حەشد و ئیتحادی دەربچن، هێزێکیش درووست بکرێت بە دەوازدە هەزار سەربازەوە کەرکووک بپارێزێت. پۆلیس وەک خۆی بمێنێ و دەزگا زانیارییەکان لە خەڵکی کەرکووک بێت و دۆسیەی ئەمنی کەرکووک رادەستی کەرکووکییەکان بکرێت”.

جەختی لەوەش کردەوە کە بەر لە دەستبەکاربوونی کازمی نامەیەکی ئاراستەی نەتەوە یەکگرتووەکان کردووە کە پرۆسەکە دەست پێبکرێتەوە، بەڵام لە وەڵامدا پێیان راگەیاندووە کە پرۆسەی سیاسی لە عێراق وەستاوە و بۆیە کارەکانیان ناتوانن جارێ دەستپێبکەنەوە.

بە پێی قسەکانی شاخەوان عەبدوڵا بێت، لە ئێستادا کە حکوومەتی کازمی دەستبەکار بووە و دۆخی ناوچەکەش رۆژ بە رۆژ بەرەو خراپبوون دەچێت، ئەگەری دەستپێکردنی کاری ئەو لێژنانە هەیە.


- هۆکاری کشانەوی ئەمریکا لە هەندێک ناوچەی عێراق

شاخەوان عەبدوڵا پەردە لەسەر هۆکاری کشانەوەی هێزەکانی ئەمریکا لە عێراق هەڵدەگرێت و داوایەکی مایک پۆمپیۆ لە عادل عەبدولمەهدی ئاشکرا دەکات کە سەری نەگرتووە و بۆیە ئەمریکییەکان بڕیاری کشانەوەیان لە هەندێک ناوچەی عێراق داوە.
لەم بارەیەوە دەڵێت: “مانگی شەشی ساڵی رابردوو وەزیری بەرگری ئەمریکا پەیامێکی بە عادل عەبدولمەهدی دا کە ئەوان لەگەڵ نەمانی حەشدی شەعبین و یان تێکەڵ بە هێزەکانی دیکە (سوپا و پۆلیس و ..) یان بە ئامانج دەکرێت. بۆیە عادل عەبدولمەهدی کۆبوونەوەیەکی کرد لەگەڵ ئەوان و بڕیارێکی دەرکرد لەگەڵ وەزارەتی بەرگری عێراق تێکەڵ بکرێن بەڵام دواجار سەرکردەکانی حەشد پاشگەز بوونەوە و وەک خۆیان مانەوە و ئەوە وایکرد کە لە زۆر ناوچە دوور بکەونەوە و بارەگاکانی خۆیان کەم بکەنەوە. ئەگەر حکوومەتی عێراق ئەو داوایەی ئەمریکییەکانی جێبەجێ بکردبایە، هەڵوەشاندنەوەی ئەو هێزانە و چوونی ژێر رکێفی فەرماندەیی هێزە چەکدارەکان، ئەو بارەگایانەی خۆی نەدەگواستەوە و کەمی نەدەکردەوە و دواجار هاوکاری لەگەڵ دەزگاکانی هەواڵگری دەکرد و ئەوە دەبووە هۆی ئەو میلیشیایانەی ئەگەر لە ناو سوپادابان، نەتوانن ئەجیندای بیانی جبەجێ بکەن”.

گوتیشی: “یەکێک لە دۆسیە هەستیارەکان کە کازمی لەسەرێتی چارەسەری بکات، دۆسیەی حەشدی شەعبییە. بە شێوەیەک کە رای گشتی ناو شەقامی شیعە رازی بکات و دڵنیایان بکات کە مووچە و ئیمتیازاتیان نابڕدرێت و تێکەڵ بە سوپا دەکرێن و داهاتوویان مسەوگەر دەکرێت”.


- “تا ئێستاش  ئاسمانی عێراق و هەستانی F16  بە ئەمری ئەمریکییەکانە”

کشانەوەی هێزەکانی ئەمریکا  لە ناوچەکانی کەرکووک وەک فاکتێکی سەرەکی بۆ واڵاکردنەوەی دەرگای جموجۆڵی داعش لە ناوچەکە سەیر دەکرێت و بە پێی قسەکانی ئەو ئەندامەی پێشووی لێژنەی ئاسایش و بەرگری ئەنجوومەنی نوێنەران، ئەمریکییەکان بۆ پاراستنی بنکەکانی خۆیان چاودێری ناوچەکە دەکەن و رۆژانە دەرچوونیان هەیە و کێوماڵی ناوچەکە دەکەن، بۆیە بوونی ئەوان خزمەت بە سەقامگیری لە ناوچەکە دەکات.
شاخەوان عەبدوڵا ئاشکراشی دەکات کە سەرەرای ئەوە عێراق فڕۆکەی F16 ی وەرگرتووە، بەڵام تا ئێستاش هەستانی ئەو فڕۆکانە لە دەسەلاتی ئەمریکییەکاندایە و ئاسمان بە دەستی ئەوانەوەیە. 
دەشڵێت: “تا ئێستا توانای سەربازی عێراق لەو ئاستەدا نییە کە بتوانێ رووبەڕووی ئەو دۆخە ببێتەوە وەک ئەوەی ئەمریکییەکان لە توانایاندایە”.


- چەکدارکردنی هۆزەکان، ئەزموونێکی شکستخواردووی عێراقە

چەکدارکردنی هۆزەکان کە حکوومەتی عێراقی هەندێک ناوچەی ئەو وڵاتە وەک پلانێک بۆ رووبەڕووبوونەوەی تیرۆر بەکاری دەهێنێ، بە لای شاخەوان عەبدوڵا “تەسلیم بوونی عێراقە بەو راستییەی کە لەو وڵاتە هەیە”.
ئەو پێی وایە، “لە نەبوونی سوپادا کە بەرگەی شەڕی تیرۆری نەگرتووە لە هەندێک ناوچە، چەکداری هۆزەکان دادەمەزرێنن کە شەڕ لە نێوان هۆزەکان و چەکدارانی تیرۆریست درووست بێ، بەڵام بە پێچەوانەوە داعش هەر لەو خەڵکە و دیسان ئەزموونی سەحواتمان هەیە کە لە ئەنبار و کەرکووک درووست کران. سەحەوات بە رۆژ پیاوی دەوڵەت بوون و بە شەو پیاوی قاعیدە و گرووپە تیرۆریستییەکان بوون. ئێستا بەهەمان شێوە ئەو ئەزموونە دووبارە دەکرێتەوە”.
شاخەوان عەبدوڵا نەیشاردەوە کە چەکدار کردنی ئەو هۆزە عەرەبانە بە تایبەتی لەو ناوچانەی کە پێکهاتەی نەتەوەیی دیکەشی تێدایە، مەترسییەکی دیکەش درووست دەکات بۆ پێکدادان لە داهاتوودا.



- لەپاڵ کێشە سیاسی و ئابوورییەکاندا، پرسی کەرکووک بۆ حکوومەتەکەی کازمی گرنگە


دەستبەکار بوونی مستەفا کازمی، کە کوردەکان هەر لەسەرەتاوە پشتیوانی خۆیان بۆ خۆی و کابینەکەی راگەیاند، ئەو ئومێدەی لای کورد دروست کردوووە کە کێشە و ناکۆکییەکانیان چارەسەر بکرێت و مێزی دانوستان بکرێتە چەقی یەکلاکردنەوەی گرفتەکان، بەڵام لەگەڵ ئەوەشدا شاخەوان عەبدوڵا بە گومانەوە سەیری دۆخەکە دەکات و دەڵێت، سەرەڕای ئەوەی پێشتر کاتێک وەک لێژنەی ئاسایش و بەرگری کاری لەگەڵ کازمی کردووە، بەڵام ئەگەر هەیە لە ژێر گوشاردا کازمی نەتوانێ هەموو خواستێکی کورد جێبەجێ بکات و دەڵێت: “دەبوایە رێکەوتینی سیاسی بکرێت لەسەر هەموو بابەتەکان. رەنگە کازمی لە ژێر گوشار شیعەدا هەموو شتێک نەتوانێت بکات. ئەوان (سیاسییەکانی شیعە) تێڕوانینیان بەرامبەر ئێمە دوژمنکارانەیە و رای گشتی خۆشیان وا تێگەیاندووە و کە لەسەریان بارین”. 
لەبارە ئەگەری گۆڕینی پارێزگاری کەرکووک، کە هەریەکە لە کورد و توکمان بە مافی خۆیان دەزانن و پارێزگاری ئێستاش لە نەتەوەی عەرەبە، شاخەوان عەبدوڵا دەڵێت، “لە ئێستادا دانانی پارێزگاکان تەنها لە دەسەڵاتی سەرۆکوەزیران دایە، لە پاڵ هەموو کێشە سیاسی و ئابوورییەکان کە ئێستا لە عێراق هەیە، بە لای ئەوان پرسی کەرکووک زۆر گرنگە”  و جەختی لەوە کردەوە کە “پارتی دیموکراتی کوردستان بە پەرۆشە بۆ چارەسەری دۆخی کەرکووک”.

ماڵپەری ئاژانسی ئانادۆڵۆ، بەشێک لەم هەواڵە ئابۆنانەی کە بڵاوکراوەتەوە لە لیستی هەواڵەکانی ئاژانسی ئانادۆڵۆ، کورت و پوخت دەکرێت ئینجا بڵاودەکرێتەوە، بۆ ئابۆنەوە کردن تکایە پەیوەندی بکەن.
بابه‌ته‌ په‌یوه‌ندیداره‌كان
Bu haberi paylaşın