"Li hemberî bûyerên li Parîsê kor, ker û lal bûn"
Serokomar Erdogan: "Yên di çalakiyên Geziyê da bi taybetî parastvaniya mafên mirovan dikirin, li hemberî bûyerên li Parîsê kor, ker û lal bûn."
Ankara
ANKARA
Serokomarê Tirkiyeyê û Serokê Giştî yê AK Partiyê Recep Tayyîp Erdogan li navenda giştî ya partiya xwe di bernameya "Şaristaniya Mirovahiyê" ya ku ji ber Roja Mafên Mirovan a Dinyayê hat lidarxistin da axivî.
Erdogan behsa bûyerên li Parîsa Fransayê kir û wiha got: "Yên di çalakiyên Geziyê da bi taybetî parastvaniya mafên mirovan dikirin, li hemberî bûyerên li Parîsê kor, ker û lal bûn. Di çalakiyên Geziyê da we dinya rakir li ser piyan. Çima, ev der Tirkiye ye ji ber wê? Hadê niha jî bi heman şiklî biweşînin."
- "Kî parastvanê mafên mirovan e? Em an ew?"
Serokomarê Erdogan behsa mafên mirovan kir û ev pirs pirsî: "Dema bi milyonan penaber ber bi Tirkiyeyê va dihatin yên ku ji me ra digotin sînorên xwe vekin, li hemberî heman mirovan têlên bidirik û dîwar di serî da gelek tevdîrên hişk dîtin. Kî parastvanê mafên mirovan e? Em an ew?"
- "Êdî tu kes nikare dersa demokrasî, mafên mirovan û azadiyê bide welatê me"
Erdogan wiha dewam kir: "Êdî tu kes nikare dersa demokrasî, mafên mirovan û azadiyê bide welatê me. Bi tenê sekna me ya li hemberî hewldana darbeyê û biratiya ku me li bajarên xwe nîşanî bi milyonan penaberan da di mijara demokrasî û mafên mirovan da tevgera me nîşan dide. Ji vir pê va dema behsa demokrasî û mafên mirovan bê kirin, cihê ku pirsgirêkan lê digerin wê tu carî ne Tirkiye be."
- "Em di serî da çi bin, îro jî ew in"
Serokomar Erdogan behsa girîngiya xebatên ji bo hilbijartina meha adarê kir û wiha got: "Em bibiryar in ku bi şev û roj bixebitin û şeva 31ê Adara 2019an 15emîn serkeftina partiya xwe pêk bînin. Tu gotineke bifors, tu peyveke biriqî, tu jiyaneke bişaşaa, durûtiya Rojava ya mafên mirovan û azadiyan venaşêre. Em di serî da çi bin, îro jî ew in."
Erdogan herî dawîn got: "Di bin banê AK Partiyê da cihê kesên kibirê dikin, xwe mezin dibînin, ji bilî berjewendiyên xwe yên şexsî tu tiştekî nabînin, tune."