"Sulmet e Izraelit në Rripin e Gazës shkatërruan edhe ekonominë rajonale"

MUHAMMED FERİD ABDULLAH

Ushtria izraelite vazhdon të kryejë sulme intensive kundër sektorit industrial dhe objekteve në Rripin e Gazës dhe të shkatërrojë infrastrukturën e mbetur nga sulmet e mëparshme në rajon, shkruan Anadolu.

Që nga fillimi i sulmeve të ushtrisë izraelite në Gaza, Izraeli shpesh synon fabrikat që u ndaluan për shkak të dobësimit të rrjeteve të energjisë, ujit dhe komunikimit.

Avionët luftarakë vazhduan sulmet në Rripin e Gazës në ditën e 12-të, duke shkatërruar plotësisht lagjet, përfshirë objektet industriale dhe tregtare në sulme.

Ekonomia e Gazës u shemb

Në deklaratën e tij për Anadolu, ministri palestinez i Ekonomisë, Khalid al-Useyli tha se sipas të dhënave të fundit të vitit 2022, në Gaza ka pasur 50 mijë objekte tregtare. Useyli thekson se objektet dhe strukturat në Rripin e Gazës, nga fabrikat e deri te dyqanet, janë bërë objektiv i sulmeve izraelite. "Izraeli sot po përpiqet të shkatërrojë plotësisht jetën ekonomike (në Gaza). Sulmet ushtarake në Rripin e Gazës shkaktuan humbje të paprecedentë në histori", tha ai.

Për shkak të vështirësisë së lëvizjes mes qyteteve në Rripin e Gazës, e cila ka qenë skena e bombardimeve të forta, ekipet e lidhura me Ministrinë e Ekonomisë dhe institucionet përkatëse nuk mund të përcaktojnë bilancin e luftës izraelite që po vazhdon prej 12 ditësh.

Ka afro 3 mijë fabrika në Gaza, 2 mijë prej të cilave kanë qenë në funksion para sulmeve izraelite dhe mijëra të tjera nuk janë vënë në shërbim prej vitesh. Kapaciteti prodhues i fabrikave aktive nuk kalon 30 për qind për shkak të kufizimeve të lëndëve të para, energjisë elektrike dhe eksportit.

Duke shpjeguar se as Ministria e Ekonomisë dhe as Shoqata e Biznesmenëve nuk kanë statistika për shkallën e shkatërrimit pasi të gjitha fabrikat i kanë mbyllur dyert që nga 7 tetori për shkak të sulmeve izraelite dhe ekipet nuk kanë mundur të lëvizin, Aseyli tha: "Nuk ka më rrugë apo rrjete kanalizimesh dhe mbi të gjitha Izraeli ka eliminuar rrjetet e energjisë elektrike. Gazi dhe karburanti kanë mbaruar. Punëtorët luftojnë për të siguruar strehim për familjet e tyre".

Përveç industrisë së veshjeve, tekstilit dhe ushqimit, në Gaza funksiononin fabrika për prodhimin e drurit dhe mobiljeve, disa industri metalike dhe prodhimin e disa llojeve të plehrave. Sipas të dhënave të Shoqatës së Biznesmenëve Palestinezë, rreth 25 mijë persona ishin të punësuar drejtpërdrejt në 2 mijë fabrika dhe afërsisht 35 mijë persona ishin të punësuar në mënyrë indirekte.

- Shkatërrimi i sektorit të komunikimeve

Sektori i telekomunikacionit ishte gjithashtu ndër objektivat e Izraelit. Sipas një dokumenti të publikuar nga Kompania e Telekomunikacionit të Palestinës më 12 tetor, 35 për qind e rrjetit të telefonisë fikse dhe internetit në shtëpi u ndërprenë, duke prekur më shumë se 50 për qind të abonentëve. Në ditët pas kësaj deklarate, këto shifra u rritën.

Sulmet izraelite shkaktuan shumë shkatërrime, përfshirë shtyllat e energjisë, kabllot dhe linjat e fibrave optike. Dëmi nuk u kufizua vetëm me kaq. Sulmet shkaktuan ndërprerje në linjat kryesore të fibrave optike që lidhin Rripin e Gazës me Bregun Perëndimor të pushtuar dhe botën e jashtme.