Fillon takimi dhe forumi i BERZH-it në Sarajevë

Mbledhja vjetore dhe Forumi i Biznesit i Bankës Evropiane për Rindërtim dhe Zhvillim (BERZH) filloi sot në kryeqytetin e Bosnjë dhe Hercegovinës, Sarajevë, raporton Anadolu Agency (AA).

Takimi dhe forumi i sivjetmë u organizua me temën “Lidhja e ekonomive për rritje më të fortë” dhe u fokusua në mënyra për të “lidhur ekonomitë për rritje më të fortë, si në Ballkanin Perëndimor, ashtu edhe jashtë tij”, thuhet në faqen e internetit të BERZH-it.

Ndër temat kryesore në ngjarjen treditore përfshihet edhe tregtia globale, "blockchain", digjitalizimi, turizmi dhe migrimi.

Pjesëmarrësit gjithashtu do të diskutojnë çështjet ekonomike në disa shtete, duke përfshirë Turqinë, Slloveninë, Bosnjë dhe Hercegovinën, Egjiptin dhe Uzbekistanin.

Rreth tre mijë ekspertë të lartë, zyrtarë qeveritarë, afaristë, specialistë për mbrojtjen e mjedisit dhe ndërmarrës do të marrin pjesë në këtë ngjarje.

Ngjarjet shoqëruese do të mbahen të martën, ndërsa diskutimet dhe ngjarjet institucionale fillojnë të mërkurën.

E themeluar në vitin 1991 për të lehtësuar rindërtimin në Evropën Qendrore dhe Lindore pas Luftës së Ftohtë, BERZH ka bërë investime në vlerë prej 130 miliardë eurove në rreth 5.200 projekte deri më tani.

Si një investues udhëheqës në Turqi, BERZH ka investuar më shumë se 11 miliardë euro në 283 projekte që nga viti 2009.

Vitin e kaluar, BERZH organizoi mbledhjen vjetore në Jordani nën temën “Ekonomitë energjizuese”.