Bie numri i shitjes së iPhone-ve

NEW YORK (AA) – Shitjet e telefonave të mençur iPhone të gjigantit amerikan të teknologjisë Apple, gjatë muajve janar-mars të këtij viti kanë shënuar rënie në krahasim me tre muajt e fundit të vitit të kaluar, transmeton Anadolu Agency (AA).

Sipas bilancit të publikuar nga Apple për tre mujorin e parë të këtij viti, shitjet e iPhone në krahasim me periudhën tetor-dhjetor të vitit të kaluar ka rënë për 32.5 për qind.

Në tre muajt e fundit të vitit të kaluar në gjithë botën janë shitur 77.3 milionë iPhone ndërsa në tre mujorin e parë të vitit 2018 ky numër ka rënë në 52.2 milionë.

Modeli i fundit dhe më i shtrenjti i Apple për telefoninë mobile iPhone X ishte futur në treg në muajin nëntor të vitit të kaluar. Ndërsa modelet iPhone 8 dhe iPhone 9 Plus, Apple i kishte futur në treg më 22 shtator të vitit të kaluar.

Sipas të dhënave të bilancit, të ardhurat e përfituara në tre mujorin e parë të këtij viti nga shitjet e iPhone, në krahasim me ato të periudhës tetor-dhjetor të vitit të kaluar me një ulje prej 38.3 për qind kanë rënë në 38 miliardë. Në tre muajt e fundit të vitit të kaluar të ardhurat nga shitjet e iPhone ishin 61.6 miliardë dollarë.

Rriten të ardhurat dhe përfitimi neto

Sipas të dhënave të bilancit të ardhurat e kompanisë në periudhën janar-mars të këtij viti, në krahasim me periudhën e njëjtë të vitit të kaluar kanë shënuar një ngritje prej 15.5 për qind dhe kanë arritur në 61.1 miliardë dollarë. Të ardhurat e Apple në tre mujorin e vitit të kaluar ishin 52.9 miliardë dollarë.

Përfitimet neto të kompanisë në periudhën janar-mars të këtij viti, në krahasim me periudhën e njëjtë të vitit të kaluar janë rritur për 25.5 për qind duke arritur në 13.8 miliardë dollarë. Kompania në periudhën e njëjtë të vitit të kaluar ka patur 11 miliardë dollarë përfitim neto.

Po ashtu njoftohet se kompania do t’i rikthejë nga tregu aksionet në vlerë prej 100 miliardë dollarësh.