Muhammet Emin Avundukluoğlu
15 Јули 2021•Ажурирај: 16 Јули 2021
АНКАРА (АА) - Неуспешниот обид за пуч во 2016 година во Турција беше обид за окупација поддржан од странство, изјави денеска претседателот на турскиот Парламент Мустафа Шентоп, јавува Агенција Анадолија (АА).
„Петнаесетти јули не е политичка дискусија, туку тоа е борба на нашата нација за постоење и непостоење. Овој обид за државен удар е движење поддржано од странство против Турција“, рече Шентоп на петтата годишнина од крвавиот обид за воен удар од страна на терористичката организација ФЕТО.
Петнаесетти јули, денот на неуспешниот пуч, сега во Турција се одбележува како Ден на демократијата и националното единство, со комеморации што се одржуваат низ целата земја.
Шентоп во Парламентот за време на церемонијата по повод комеморацијата повтори дека припадниците на ФЕТО се инфилтрирале во судската, воената и цивилната бирократија на земјата.
„Како што беше демонтиран апаратот на ФЕТО, Турција започна да презема посигурни и поодлучни чекори кон своите национални цели“, рече тој.
„Ослабување, дискредитација и ублажување на борбата на Турција против ФЕТО, во суштина значи предавство на земјата“, нагласи Шентоп.
„Значајна карактеристика на пучистите и нивните приврзаници во Турција е тоа што тие не се национални на ниеден начин“, додаде тој.
Терористичката организација ФЕТО и нејзиниот водач Фетула Ѓулен, кој живее во Соединетите Американски Држави (САД), стојат зад неуспешниот обид за пуч во Турција на 15 јули 2016 година, во кој загинаа 251 лице, а беа повредени 2.734 лица.
ФЕТО стои и зад долготрајната кампања за уривање на државниот поредок преку инфилтрирање на своите приврзаници во турските институции, особено во војската, полицијата и судството.
