Турција ја подготвува базиликата во Изник за првата посета на папата Лав во странство
Базиликата, која се наоѓа на околу 20 метри од брегот на езерото во покраината Бурса, се верува дека се наоѓа на местото на Првиот никејски собор, кој бил свикан во 325 година од нашата ера за да ги реши клучните теолошки спорови
Фото: Volkan Bayraktar/AA
БУРСА (АА) - Археолозите во северозападна Турција ја подготвуваат древната базилика потопена во езерото Изник за посетата на папата Лав XIV, што се очекува подоцна оваа година, по повод 1.700-годишнината од Првиот никејски собор - еден од најважните собири на раното христијанство, јавува Анадолу.
Базиликата, која се наоѓа на околу 20 метри од брегот на езерото во покраината Бурса, се верува дека се наоѓа на местото на Првиот собор, кој бил свикан во 325 година од нашата ера со епископи од целиот христијански свет за да ги реши клучните теолошки спорови.
Локалитетот е откриен пред 11 години на длабочина до два метра.
Подводните ископувања, овластени од турското Министерство за култура и туризам, се во тек од 2015 година под надзор на Мустафа Шахин од Универзитетот Бурса Улудаг, со поддршка од Општина Бурса.
Шахин за Анадолу изјави дека тим од 60 археолози, антрополози, реставратори и историчари на уметност работат на подготовка на локацијата за планираната посета на папата во периодот од 28 и 30 ноември.
Со димензии од 20 на 40 метри, базиликата се смета за најголема позната црква во Изник. Шахин рече дека доказите укажуваат на тоа дека градбата е одамна изгубената Црква на Светите Отци, која долго време се споменува во христијанските извори, но никогаш не е потврдена досега - тврдење кое е сè повеќе прифатено меѓу научниците.
Тој рече дека посетата на папата Лав би можела да помогне Изник (историски познат како Никеја) да стане важен центар за христијанско поклонение и верски туризам.
„Дури и еден камен овде има големо значење за христијаните“, рече тој.
„Нема потреба од големи згради - самото постоење на ова место е значајно.“
Шахин додаде дека базиликата првично била изградена како капела посветена на Свети Неофит, уништена во земјотрес во 358 година и обновена по 380 година од н. е. Ископувањата откриле 37 гробови, многу од нив обновени на нивните оригинални локации за да се зачува автентичноста.
„Ги вративме гробовите во нивната оригинална состојба за да можат безбедно да бидат изложени“, рече тој.
Планираното патување на папата Лав XIV во Изник ќе биде негова прва посета во странство откако ја презеде функцијата на папа, по што се очекува да отпатува за Либан, според „Ватикан њуз“.
