ИСТАНБУЛ (АА) – Турција ги зголеми мерките за безбедност на границите и воздушниот простор како одговор на зголемените тензии на Блискиот Исток, а министерот за одбрана Јашар Ѓулер ги осуди воените напади на Израел врз Иран и предупреди на опасност од регионална дестабилизација, јавува Анадолу.

Ѓулер, во видеоконференцијата со армиските команданти, нагласи дека Турција внимателно ја следи ситуацијата од почетокот на нападите и презема „сеопфатни и цврсти мерки“ за заштита на својата територија.

„Под директива на нашиот претседател дејствуваме со проактивен безбедносен пристап“, рече тој. „Во блиска координација со надлежните институции, ги разгледуваме сите можни сценарија што би можеле да ја засегнат нашата земја.“

„Ги осудуваме незаконските напади на Израел врз Иран, нашата соседна земја, кои започнаа изминатиот петок“, изјави Ѓулер.

„Незаконските операции на Израел - прво во Газа, потоа во Либан, а сега и во Иран - повторно ја покажуваат јасната намера конфликтот да се прошири низ целиот регион.“

„Израел со своите дејства го влече регионот во хаос“, рече тој, повикувајќи ја меѓународната заедница итно да дејствува за да се запрат „произволните потези на Израел што имаат цел да го потопат регионот во хаос.“

- „Челична купола“ -

Министерот за одбрана ја претстави и долгорочната стратегија за одбрана на Турција, вклучително и развојот на интегриран воздушен одбранбен систем наречен „Челична купола.“

Се очекува овој систем да функционира во координација со домашно развиениот борбен авион „Каан“ и различни ракетни системи.

„Под водство на нашиот претседател, наша најголема цел е да постигнеме највисоко ниво на одбранбена способност за заштита на татковината преку системот за воздушна одбрана ‘Челична купола’“, изјави Ѓулер.

Тој заврши потврдувајќи ја решеноста на Турција не само да набљудува туку и да ги обликува случувањата во регионот.

„Ќе продолжиме ефикасно да ги спроведуваме нашите повеќедимензионални и длабински одбранбени и безбедносни политики, преземајќи ги сите потребни чекори без двоумење.“