АНКАРА (АА) – Турција изрази сочувство до Канада откако 10 лица, вклучувајќи го и осомничениот вооружен напаѓач, се убиени во пукање во градот Тамблер Риџ во западната покраина Британска Колумбија, јавува Анадолу.

„Длабоко сме ожалостени од загубата на животи во пукањето што се случи вчера (10 февруари) во училиштето во покраината Британска Колумбија, Канада“, се вели во соопштението на турското Министерство за надворешни работи.

„Изразуваме сочувство до семејствата на оние што ги загубија животите во овој ужасен напад и до народот на Канада, а на повредените им посакуваме брзо закрепнување“, се додава.

Претходно, Кралската канадска коњаничка полиција соопшти дека девет жртви и еден осомничен загинале во пукањето, јави Канадската радиодифузна корпорација (CBC).

Шест лица се пронајдени мртви во средното училиште Тамблер Риџ, едно лице починало додека е транспортирано во болница, а уште две се пронајдени мртви во дом во заедницата за која се верува дека е поврзана со пукањето, објави полицијата.

Оттаму соопштија дека осомничениот е пронајден мртов во училиштето од „самонанесена повреда“.

Нападот е втор најсмртоносен напад во училиште во историјата на Канада, по пукањето во декември 1989 година во Политехничката школа во Монтреал, во кое загинаа 14 лица.

Тамблер Риџ, град со околу 2.400 жители во западна Канада, се наоѓа во подножјето на Карпестите Планини, на околу 680 километри од границата со САД.

Истрагата за инцидентот е во тек.