Турција: Семејствата во Дијарбакир и во првиот ден од 2020-та бараат враќање на децата од терористичките кампови на ПКК

ДИЈАРБАКИР (АА) - Семејствата продолжуваат со мирните протести пред седиштето на Народната демократска партија (HDP) во Дијарбакир, југоисточна Турција, на кои мајките веќе 121 ден бараат да им се вратат децата одведени во терористичките кампови на ПКК, јавува Агенција Анадолија (AA).

Семејствата не се откажаа од протестот ни првиот ден од новата 2020 година.

На протестот е и мајката Севдет Демир, која во рацете држи фотографии од нејзиниот син Фатих. Вели дека нејзиниот син, пред четири години, преку партијата ХДП бил одведен во редовите на терористите на ПКК. Порачува дека одлучно ќе продолжи со протестот во Дијарбакир, сè додека нејзиното дете не се врати.

„Сигурна сум дека ХДП го однесе моето дете во планина. Како и да го измамиле и однеле, така и нека го вратат. Дојдовме овде за нашите деца“, рече Демир, и додаде:

„Нека паѓа и снег и, ако треба ќе умрам од студ, но нема да го напуштам ова место сè додека не се врати моето дете. Ние ги бараме нашите деца и тоа е наше право.“

Додава дека би била среќна доколку беше во можност денеска со синот да ја прослави Новата година. „За жал, откако детето ми е одведено, за нас нема празници и радост“, рече Демир.

Мајката Емине Каја исто така рече дека нема намера да се откаже од протестот сè додека не ѝ се врати детето.

„ХДП го киднапираше моето дете, го дадоа на ПКК. Овде сум 121 ден. Се надевам дека ќе добијам новости за мојот син. Ќе останам тука дури и ако трае 121 година“, рече Каја, додавајќи дека ѝ недостига нејзиното дете и дека се надева на добри вести.

Шевкет Бинѓол, чиј син Тунџај е однесен во камповите на ПКК пред пет години, вели дека ова е уште една Нова година во која влегуваат тажни, без своите деца.

„Сите денеска слават со своите деца, радосни се. Ние сме тажни. Тука сме 121 ден и нема да се откажеме. ХДП го одведе мојот син и немам намера да заминам оттука додека не ми го вратат моето дете“, порача очајниот татко.

Додава дека неговиот син сакал да стане полицаец или војник.

„Во новата 2020 година сакав да влезам со мојот син. ХДП овде игра игри, сака да направи поделби меѓу Курдите. Затоа, сакам да испратам порака до пратениците на ХДП да не го политизираат ова прашање. Не играјте повеќе игри со курдската крв, поднесете оставки“, рече Бинѓол.

На социјалните мрежи започна кампања за поддршка на мајките кои ја обвинуваат партијата ХДП за врбување и одведување малолетни и млади лица во терористичките кампови на ПКК во југоисточна Турција. Мајките поради тоа го продолжуваат протестот започнат од Февзије Четинкаја.

Четинкаја, патем, има 11 деца, а на 30 август пријавила во полиција дека активисти на ХДП го киднапирале и во терористички камп го одвеле нејзиниот син С. Четинкаја.

На 3 септември мајката Четинкаја започна мирен протест пред зградата на ХДП, а со неа тогаш беа сопругот Шахап и нивните четири деца. Потоа и Омер Т. и Ремзије А. дојдоа пред седиштето на ХДП и го поддржаа протестот на Четинкаја и нејзиното семејство, тврдејќи дека терористичката група ПКК ги киднапирала и нивните деца.

ПКК е сепаратистичка организација којашто се наоѓа на списокот терористички организации на Турција, Европската Унија и Соединетите Американски Држави (САД). За време на тридецениската терористичка кампања против Турција, терористите на ПКК убија најмалку 40.000 луѓе.

Партијата ХДП се товари за поврзаност со терористите на ПКК, а повеќе челници на партијата се обвинети за ширење терористичка пропаганда и за помош на терористите.