Aylin Dal
18 Март 2021•Ажурирај: 19 Март 2021
АНКАРА (АА) - Турскиот државен обвинител Бекир Шахин поднесе обвинение пред Врховниот суд на Република Турција (Јаргитај), со кое бара прекин на работата и укинување на Народната демократска партија (ХДП) поради поврзаност со тероризмот, дејствување против уставниот поредок, државата и народот, јавува Агенција Анадолија (АА).
Во текстот на обвинението се наведува дека трајното затворање на ХДП е правна обврска за неделивиот интегритет на Република Турција, како и за јавниот мир и безбедноста, поради што е побарано затворање на партијата и целосно одземање на финансиските бенефиции.
Истакнато е дека врз основа на претходните обвиненија и пресуди против членови на ХДП и други собрани докази утврдено е дека партијата е целосно под контрола на терористичката организација ПКК/КЏК, исто како и партиите кои се претходно затворени со одлуки на Уставниот суд на Турција. Обвинителот во обвинението истакнува дека ХДП е огранок на терористичката организација ПКК.
Исто така, наведено е дека состаноците и конгресите на ХДП не се слични на собирите и конгресите на партиите во Турција кои се основани во согласност со Уставот и законите, туку дека станува збор за собири на кои се извикуваат пароли во корист на сепаратистичката терористичка организација ПКК и нејзиниот водач Абдула Оџалан.
Нагласено е дека салите во кои се одржуваат конгресните собири на ХДП се „украсени“ со фотографии од терористичките кампови и обележја на терористичката организација.
„Конгресите на обвинетата партија се повеќе од конгресите на една политичка партија. Тие повеќе се пропаганда на терористичката организација и на нив се дава едноминутно молчење за мртвите терористи. Такви собири се одржуваат практично како конгреси на ПКК, на кои се покажува отворено непријателство кон нашиот уставен поредок и унитарна државна структура“, пишува во обвинението.
Истакнато е дека ваков собир е одржан на 23 февруари 2020 година, за кој Републичкото обвинителство во Анкара поведе истрага.
ПКК е сепаратистичка организација којашто се наоѓа на листата терористички организации во Турција, Европската Унија и САД. Во текот на тридецениската терористичка кампања против Турција, терористите на ПКК убија најмалку 40.000 луѓе.
Партијата ХДП се товари за поврзаност со терористите на ПКК, а повеќе лидери на таа партија се обвинети за ширење терористичка пропаганда и пружање помош на терористите.
