Турција го проширува управувањето со технологијата со нови директорати за вештачка интелигенција

ИСТАНБУЛ (AA) – Турција презеде нови чекори за проширување на екосистемот за вештачка интелигенција и за поширока примена на оваа технологија во јавниот сектор со одлуките објавени вчера во Службениот весник, соопшти министерот за индустрија и технологија Мехмет Фатих Каџир, јавува Анадолу.

Генералната дирекција за национална технологија при Министерството е преименувана и отсега ќе функционира како Генерална дирекција за национална технологија и вештачка интелигенција, објави Каџир.

Според министерот, преименуваната дирекција ќе развива и спроведува политики и стратегии за проширување на инфраструктурата за центри за податоци и облак-компјутинг во Турција, ќе утврдува критериуми и стандарди за дата-центри, а ќе врши и надзор над регулативите поврзани со процесите на сертификација и овластување.

Дирекцијата, исто така, ќе работи на обезбедување развој и употреба на технологиите за вештачка интелигенција во согласност со етички и сигурни принципи, на зголемување на капацитетите за податоци, инфраструктура и човечки ресурси, поддршка на стартапи и истражувачки активности, координација на националното управување со вештачката интелигенција, како и на унапредување на меѓународната соработка, наведе Каџир.

Одделно, под Дирекцијата за кибербезбедност при Претседателството е формирана Генерална дирекција за јавна вештачка интелигенција, чија цел е да ја насочува употребата на вештачката интелигенција во државните институции.

Новата единица ќе ги предводи регулаторните активности за примена на вештачката интелигенција во јавниот сектор, ќе придонесува за усогласување на националното законодавство со меѓународните рамки и ќе утврдува принципи и стандарди за управување со податоци поврзани со дигиталната управа и употребата на вештачката интелигенција во државните институции, истакна министерот.

Дирекцијата за јавна вештачка интелигенција, исто така, ќе ги идентификува институционалните потреби, ќе воспостави заедничка инфраструктура за простор за податоци и ќе дефинира стандарди за квалитет на сетовите на податоци што се користат во апликациите со вештачка интелигенција, додаде Каџир.

„Со силна координација меѓу засегнатите страни во јавниот сектор, академијата и приватниот сектор, ќе обезбедиме Турција да стане една од водечките земји во областа на вештачката интелигенција“, рече Каџир.