ИСТАНБУЛ (АА) - Турција е гарант на мирот, стабилноста и правдата, изјави денес турскиот министер за надворешни работи, нагласувајќи ја улогата што Анкара ја игра за спречувањето и ставањето крај на конфликтите, јавува Анадолу.

„Нашата дипломатска сила игра одлучувачка улога во спречувањето и ставањето крај на војните. Денес, Турција стана гарант на мирот, стабилноста и правдата во нашиот регион. Благодарение на дипломатијата спроведена под водство на шефот на државата, беа разоткриени нелегитимните политики на Израел и угнетувањето од ционизмот, додека палестинската кауза доби импулс и поддршка на меѓународните форуми“, рече Хакан Фидан на церемонијата по повод поставувањето камен-темелник на новиот комплекс на турското Министерство за надворешни работи во главниот град Анкара.

„Денес, од Украина до Сирија, од Кавказ до Рогот на Африка, Турција стана актер што може да ја обликува регионалната динамика“, рече Фидан, додавајќи дека благодарение на силното водство на претседателот Реџеп Таип Ердоган, земјата успеа да се држи подалеку од „кругот на огнот“.

Истакнувајќи ја трансформацијата на дипломатијата, Фидан рече дека со појавата на модерната дипломатија, начините од 17 и 18 век отстапија место на нови процедури и поинституционализирани методи.

Тој нагласи дека дипломатијата еволуирала од привремени контакти во комплексни и сеопфатни односи исткаени со меѓузависност.

„Ние, исто така, го прошируваме нашето присуство во странство. Со 263 странски мисии, сега ја имаме третата најголема дипломатска мрежа во светот“, додаде тој.

Фидан подвлече дека „пред нас се нови простори, нови предизвици, променливи рамнотежи и нови можности и затоа, посилна дипломатија е потребна повеќе од кога било“.

Тој нагласи дека турската дипломатија е вкоренета во длабоко врежаната традиција и институционална меморија што се протега со векови.

„Денес, постои Турција што води независна и национална надворешна политика, Турција што има глас за регионалните и глобалните прашања“, рече тој.

Фидан рече дека договорите, записниците и мемоарите зачувани во архивите на Министерството служат и како меморија на турската нација.