Merve Gül Aydoğan Ağlarcı
05 Јануари 2022•Ажурирај: 06 Јануари 2022
МУГЛА / БАЛИКЕСИР / ИЗМИР
Турција спаси 79 мигранти во Егејското Море, откако беа истуркани од грчката крајбрежна стража, пренесува Агенција Анадолија (АА).
„Во Егејското Море кај подрачјето Даламан во југозападната област Мугла, тимовите на крајбрежната стража спасија 31 мигрант кои незаконски беа истуркани од грчката страна“, изјави извор кој сакаше да остане анонимен поради ограничувањата за разговор со медиумите.
Одделно, тимовите спасиле 19 дополнителни мигранти кои на сличен начин биле оттурнати во Егејското Море во близина на областа Бодрум во Мугла, според друг извор.
Командата на турската крајбрежна стража соопшти дека дополнителни 29 нерегуларни мигранти биле спасени во близина на брегот на подрачјето Ајвалик во областа Баликесир во западна Турција.
Сите мигранти се префрлени во локалната канцеларија за миграција во областа.
Во одвоено соопштение, командата на турската крајбрежна стража соопшти дека најмалку 318 нерегуларни мигранти биле турнати од грчките официјални лица, додека други 84 мигранти биле задржани при обид за нелегално преминување на границата во првите четири дена од 2022 година.
Според соопштението, екипите на крајбрежната стража ги спасиле мигрантите во гумени чамци на четири локации во близина на брегот на областите Карабурун, Чешме, Дикили и Фоча во областа Измир.
Турција и групите за човекови права континуирано ја осудуваат грчката незаконска практика за истуркување на мигрантите назад во турските територијални води, потенцирајќи дека со тоа се прекршува меѓународното право и хуманитарните вредности, се загрозуваат животите на ранливите мигранти, меѓу кои има и деца и жени.
Турција е клучна рута за транзит на мигрантите кои имаат цел да преминат во Европа и да започнат нови животи, особено оние што бегаат од војна и прогон.
Турција веќе прими 4 милиони мигранти, повеќе од која било држава во светот, и презема нови безбедносни мерки на своите граници за да спречи нов бран мигранти.
