Gökhan Ergöçün
29 Февруари 2024•Ажурирај: 01 Март 2024
ИСТАНБУЛ (АА) - Туркије доби „Предлог-понуда и писмо за прифаќање“ од Соединетите Американски Држави (САД) за набавка на 40 нови Ф-16 Блок 70 борбени авиони, соопшти денес турското Министерство за национална одбрана, јавува Анадолу.
Портпаролот на Министерството, бригадниот адмирал Зеки Актурк, истакна дека во писмото е вклучена и модернизацијата на постојните 79 авиони, муниција и опрема.
Туркије во октомври 2021 година побара од САД да купи 40 нови авиони Ф-16 Блок 70, како и 79 комплети за модернизација за да ги надгради преостанатите Ф-16 на ниво на Блок 70.
Портпаролот, исто така, истакна дека турските сили неутрализирале 25 терористи во текот на изминатата недела, меѓу кои и терористи кои се кријат преку границата во северен Ирак и Сирија.
„Вкупно 458 терористи се неутрализирани во операциите, 193 во северен Ирак и 290 во северна Сирија од 1 јануари“, додаде бригадниот адмирал Актурк.
„Безбедносните сили приведоа 101 лице, меѓу кои четворица терористи, при обид илегално да ги преминат границите на Туркије во текот на изминатата недела“, соопшти Актурк.
Тој додаде дека уште 2.384 лица се спречени при преминување на границите во последните седум дена.
„Бројот на приведени при обид за илегално преминување на нашите граници се искачи на 1.448 од 1 јануари до денес. Бројот на лица кои беа спречени да ја преминат границата (оваа година) е 30.015“, рече портпаролот на Министерството.
Туркије е клучна транзитна рута за нерегуларните мигранти кои сакаат да стигнат во Европа за да започнат нов живот, особено оние кои бегаат од војна и прогон. Земјата, која веќе е домаќин на 4 милиони бегалци, повеќе од која било друга земја во светот, презема нови мерки на своите граници за да спречи нов прилив на мигранти.
Терористите на ПКК често се кријат во северен Ирак каде планираат прекугранични напади во Туркије. Во својата над 35-годишна терористичка кампања против Туркије, ПКК, која е ставена на листата на терористички организации од страна на Туркије, САД и ЕУ, е одговорна за смртта на повеќе од 40.000 луѓе, меѓу кои и деца и жени. ЈПГ е сириски огранок на ПКК.
