Туркије неутрализираше седуммина терористи на ПКК во Северен Ирак и Сирија

АНКАРА (АА) — Турските безбедносни сили „неутрализираа“ вкупно седуммина терористи на ПКК/ЈПГ во Северен Ирак и Сирија, во близина на турската граница, соопшти денес Министерството за национална одбрана, јавува Анадолу.

„Тројца од терористите се неутрализирани во зоната на операцијата 'Канџа-катанец' во Северен Ирак, а четворица се неутрализирани во зоната на операцијата 'Штитот на Еуфрат' во Северна Сирија“, се вели во соопштението на Министерството.

Терористичката организација ПКК е позната по тоа што го користи Северен Ирак, во близина на турската граница, како засолниште за планирање терористички напади и за изведување напади и врз Туркије и врз локалното население во Северна Сирија.

Од 2016 година Анкара започна три успешни антитерористички операции преку своите граници во Северна Сирија за да спречи формирање терористички коридор и да овозможи мирно враќање на жителите: „Штитот на Еуфрат“ (2016), „Маслинова гранка“ (2018) и „Извор на мирот“ (2019).

Во својата речиси 40-годишна терористичка кампања против Туркије, ПКК, која е ставена на листата на терористички организации од страна на Туркије, САД и ЕУ, е одговорна за смртта на над 40.000 луѓе, вклучително деца и жени. ЈПГ е сириски огранок на ПКК.