Туркије: Над 1,7 милиони луѓе на митингот во Истанбул

ИСТАНБУЛ (АА) - На помалку од една недела до претседателските и парламентарните избори во Туркије, претседателот Реџеп Таип Ердоган одржа голем митинг вчера во Истанбул на кој присуствуваа најмалку 1,7 милиони луѓе, јавува Анадолу.

Ердоган ги поздрави присутните на митингот во Истанбул и потсети на достигнувањата на неговата влада во последните 21 година.

Турскиот претседател рече дека неговата влада тројно го зголемила националниот приход во текот на изминатите 21 година. „За 21 година обезбедивме работа и храна за 21 милион луѓе придодадени на нашето население. Изградивме 10,5 милиони нови домови за 21 година и им обезбедивме на семејствата дом.“

Тој ја критикуваше турската опозиција поради нејзината непријателска реторика за домашните беспилотни летала и борбените дронови, и вети дополнително зајакнување на одбранбената индустрија на земјата.

Во однос на енергетиката, Ердоган потсети на резервите на природен гас и нафта вредни милијарди долари, откриени во Црното Море и во јужниот дел на Туркије, во областа Габар, што се ставени на располагање на турската нација.

Ердоган, исто така, рече дека неговата влада го спроведува „Големиот проект за Истанбулскиот тунел“, за кој рече дека „ќе биде третата цевка што ќе минува низ Мраморното Море“.

„Го подготвуваме Истанбул за ‘Столетието на Туркије’, а Истанбул ќе биде локомотива за подемот на ‘Столетието на Туркије’“, додаде тој.

Изборите во Туркије ќе се одржат на 14 мај. На ливчето на претседателски кандидати гласачите ќе избираат меѓу актуелниот претседател Реџеп Таип Ердоган, кој се кандидира за реизбор, и кандидатите од опозицијата Кемал Киличдароглу, Мухарем Инџе и Синан Оган.

На изборите, за места во 600-члениот турски Парламент ќе се борат 24 политички партии и 151 независен кандидат.