Туркије го поздрави потегот на САД да ги исклучи условите за продажбата на Ф-16

ИСТАНБУЛ (АА) - Туркије денеска го поздрави потегот на Соединетите Американски Држави (САД) да исклучат одредени одредби во конечниот текст на американскиот буџет за одбрана за продажбата на авионите Ф-16 на Анкара, јавува Агенција Анадолија (АА).

На заедничката прес-конференција со молдавскиот колега Нику Попеску во Истанбул, турскиот министер за надворешни работи, Мевлут Чавушоглу, рече: „На крајот, отсуството на негативен елемент [во Нацрт-законот] е позитивен развој. Ние го поздравуваме ова.“

Амандманите претставени пред Претставничкиот дом на САД, според кои продажбата на борбени авиони Ф-16 на Туркије зависи од низа услови, беа отстранети во конечниот Нацрт-закон за трошоците за одбрана.

„Одобрувањето на овој предлог-закон и завршувањето на набавката е во сечиј интерес“, рече Чавушоглу, додавајќи дека процесот треба да се финализира што е можно поскоро.

Потегот следуваше откако два амандмани предложени од демократските сенатори, Боб Менендез и Крис Ван Холен, со кои се врзуваше продажбата на Ф-16 на Туркије под одредени услови, беа отстранети од верзијата на Сенатот за годишниот Нацрт-закон за трошоците за одбрана на САД.

Преку амандманите беше направен обид за воведување на неколку ограничувања за продажба на Ф-16 и комплети за модернизација на Туркије, вклучително и услов да не се користат борбените авиони во нарушување на грчкиот воздушен простор и да се бара од администрацијата на Бајден да потврди дека продажбата ќе биде во национален интерес.

Откако Сенатот ќе го усвои Законот за овластување за национална одбрана, тој ќе биде направен во заеднички текст со претходната верзија донесена во Претставничкиот дом пред да биде испратен до претседателот Џо Бајден за да биде потпишан како закон.