Туркије ги повикува европските земји да преземат мерки по нападите на поддржувачите на терористичката организација ПКК

ИСТАНБУЛ (АА) - Поради серијата напади на поддржувачите на терористичката организација ПКК во Европа, Туркије денес ги повика европските земји да преземат итна акција, наведувајќи дека очекува засегнатите земји да ги изведат напаѓачите пред лицето на правдата, пренесува Анадолу.

Поддржувачите на ПКК синоќа го нападнаа влезот на Генералниот конзулат на Туркије во Хановер, Германија. Нема загинати или повредени, но е направена штета на зградата која германските безбедносни служби се должни да ја заштитат како официјално претставништво на Туркије во таа земја.

Турското Министерство за надворешни работи соопшти дека по нападот биле контактирани германските официјални лица и дека биле потсетени дека тие се одговорни за „безбедноста на нашите граѓани и дипломатските претставништва и дека не смеат да се толерираат провокации против турската заедница во Европа“.

„Терористичката организација ПКК, која сега е ставена во ќош, ги интензивира своите акции против турската заедница во Европа. Благодарение на здравиот разум на нашите граѓани, овие провокации не доведоа до посериозни инциденти“, се наведува во соопштението.

„Очекуваме засегнатите земји да покажат нулта толеранција кон дејствијата на поддржувачите на терористичката организација и што е можно поскоро да ги изведат сторителите пред лицето на правдата.“

Нападот врз Конзулатот, што се случи за време на маршот на поддржувачите на терористичката ПКК, следуваше по слични акции во последните денови во Хамбург и Белгија, вклучително и напади врз локални Турци.

Во својата над 35-годишна терористичка кампања против Туркије, ПКК, којашто е ставена на листата на терористички организации од страна на Туркије, Соединетите Американски Држави и Европската Унија, е одговорна за смртта на над 40.000 луѓе, меѓу кои и деца и жени. ЈПГ е сириски огранок на ПКК.

Иако е официјално забранета во Европската Унија и поединечни земји членки, во практика на терористичката организација ПКК ѝ е дозволено да протестира, да собира средства за својата терористичка кампања и да се заканува или да го напаѓа локалното население во европските земји.

Туркије силно ја осудува толеранцијата кон терористичката организација ПКК и нејзините поддржувачи во Европа.